Díli-SMI: Prezidente atúal RTTL, E.P, José António Belo “Taraleu” liu-hosi ninia diskursu ho fiar an hodi deklara katak sei halo mudansa durante mandate tinan 4 ba iha área perioridade sira hanesan hadi’a edifísiu foun ba RTTL, E.P, sosa ekipamentu foun tuir padraun internasional, hasa’e kualidade notisia no buka fundu rasik.
Maske nune’e, José Belo, sente katak reponsabilidade ne’ebé nia simu todan oituan maibe sei esforsu an hodi bele hametin obra sira ne’ebé hala’o tiha ona eis Prezidente Konsellu Administrasaun RTTL, E.P sira hodi garante motto ka lema RTTL nian.
“Ohin ha’u simu pose nu’udar Prezidente RTTL, E.P foun maibe responsabilidade ne’ebé ha’u simu todan oituan. “Ha’u sei hatutan obra sira ne’ebé mak kolega sira halo ona no presija servisu hamutuk hodi hadi’a di’ak liu tan RTTL.E.P. ne’e hodi sai empreza estatál ida ne’ebé mak forte no hala’o duni nia funsaun no sai hanesan roman lolos ba nasaun ida ne’e, tuir lema ka motto RTTL nian katak, promove dezenvolvimentu, harmónia sosiál no unidade nasionál”, dehan, José Belo, iha Salaun MAPKOMS, Tersa, (11/05).
Maibe, José Belo, hatutan, atu realiza ninia mehi hodi halo mudansa ba área importante hirak ne’ebé sai tarjetu presiza apoiu hosi Governu no entidade sira seluk iha Timor-Leste.
Eis Diretúr mídia online Tempo Timor ne’e afirma, sei la-halis ba koor partidu ruma durante hala’o ninia mandatu hanesan Prezidente Konsellu Administrasaun RTTL, E.P nune’e bele garante independensia RTTL iha ámbitu hato’o informasaun ba públiku.
Iha parte seluk, Ministru ba Asuntu Parlamentar no Komunikasaun Sosiál – MAPKOMS, Francisco Jerónimo, sadik Prezidente RTTL, E.P foun atu bele halo serbisu ho di’ak no bele realiza promesa sira iha tempu badak nia-laran.
Tanba, nia hatutan, Governu iha komitmentu atu apoiu ba RTTL, E.P atu sai empreza públiku ne’ebé la’os tinan ba tinan hein de’it doasaun orsamentu hosi Governu.
“Parte Governu sei kria kondisaun hotu atu RTTL sai empresa públika ida ne’ebé bele hamriik mesak no sei la hein deit doasaun no transferénsia públiku husi governu”, dehan, Jerónimo.
MAPKOMS mós husu ba Prezidente RTTL, E.P foun atu kontinua serbisu bazea ba lei Komunikasaun Sosiál artigu 42 hodi nune’e bele garante informasaun ba públiku ho rigor no kredivél.
Prezidente RTTL, E.P foun, José António Belo “Taraleu” troka Francisco da Silva Gari ne’ebé hetan ezenora hosi Konsellu Ministru iha loron 5 fula Maiu tinan ida-ne’e. (Editór, Zé Amaral).