Díli-SMI: Ministru Obras Públikas – MOP, Salvador Soares Pires, hateten, dezde ukun-an to’o ohin loron maizumenus suku hamutuk hitu nolu resin neen (76) mak seidauk asesu enérjia eletrisidade hanesan suku sira seluk iha territóriu laran.
“Ba suku sira ne’e, iha 76 suku mak seidauk asesu eletrisidade, no tuir planu atividade normál 34 mak ita atu halo iha tinan ne’e”, dehan, Salvador Pires, iha Ótel Novu Turizmu, Segunda, (10/05).
Salvador, esplika, Governu halo ona planu ba projetu foun hamutuk 34 mak iha ona alokasaun Orsamentu Jerál Estadu – OJE 2021 hodi fornese enérjia eletrisidade ba suku sira ne’ebé seidauk hetan asesu eletrisidade.
“Iha OJE 2021, Ministériu Obras Públikas aloka ona orsamentu ba projetu 34, nune’e EDTL,E.P daudauk ne’e hahú ona prosesu ba realizasaun kontratu hodi dada liña enérjia eletrisidade ba komunidade iha suku 34, restu ne’e sei halo dezeñu no implementa projetu iha tinan tuir mai”, katak, Salvador.
Atu bele implementa projetu planeadu hamutuk 34 ne’e dadaun parte tekniku hahú ona preparasaun hanesan halo akizasaun ba material sira kona-ba infra-estrutura liña distribuisaun, ai-riin, fiu sira ne’ebé tama iha projetu instalasaun enérjia eletrisidade nian.
Parte seluk, Governante ne’e mós esklarese katak intermus tekniku hetan dezafiu hanesan rekursu umanu maibe kontinua esforsu hodi kompleta administrativu hodi nune’e bele implementa projetu refere ho di’ak.
“Ami ko’alia hela dezafiu sira hanesan falta rekursu umanus, sira tenke halo prosesu rekrutamentu, Graça de Deus unidade sira importante hanesan jestaun finansas, no mós administrasaun, sira iha ona ema ne’ebé ajuda sira halo hela rekrutamentu, estabelese perfil kompañia nian atu nune’e bele ezekuta planu sira ne’e tuir tempu ne’ebé ita hakarak iha tinan fiskál ida-ne’e”, tenik nia.
Dadaun ne’e parte ekipa EDTL, E.P halo hela prosesu tenderizasaun ba ekipamentu no material konstrusaun antes halo mobilizasaun ba fatin sira ne’ebé identifikadu ona atu halo instalasaun enérjia eletrisidade.
To’o ohin loron komunidade iha área remota sira kontinua halerik tanba maioria seidauk asesu enérjia eletrisidade. (Editór, Caleri).