Díli-SMI: Durante fulan ida nia laran hahú sura hosi loron 6 Abril to’o 13 Maiu 2021 Governu liu-hosi Sentru Integradu Jestaun Krize – SIJK fó sai ona relatóriu ofisiál katak maizumenus timoroan hamutuk na’in 7 mak mate ona ho COVID-19 ne’ebé kompostu hosi feto ema na’in 3 no mane ema na’in 4.
Iha semana primeiru ka inisiu fulan Maiu 2021 ne’e maizumenus timoroan ema na’in 3 ne’ebé identifika mate ho COVID-19.
“Informa mós ba públiku katak ohin iha kazu óbitu/mate ho Covid-19 iha na'in 3. Ida iha fatin izolamentu ba kazu moderadu ho grave iha Vera Cruz”, dehan, Kordenadór Forsa-Tarefa ba Prevensaun no Mitigasaun Surtu COVID-19 iha Timor-Leste - CIGC-SS, Rui Maria Araújo, liu-hosi komunikadu imprensa, Kinta, (13/05).
Rui Araújo, esklarese, hosi ema na’in 3 ne’ebé mate ho COVID-19 durante loron ida nia-laran ne’e ema na’in ida mate iha sala izolamentu Vera Cruz, ida na’in ida mate iha Liquiça no ema na’in ida seluk mate iha area Caicoli, Díli.
“Na'in rua seluk detetadu pozitivu iha loron hirak liubá, maibe rekuza atu baixa iha Vera Cruz, no obriga-an hela deit ka fila ba uma. Ida iha Liquiça no ida iha Caicoli, Dili. Ohin ekipa saúde konjunta simu informasaun katak ida iha Liquiça hakotu-iis iha uma, ida iha Caicoli, Dili, hakotu-iis iha dalan ba HNGV”, dehan, eis Primeiru Ministru ne’e.
Eis Ministru Saúde ne’e mós relata katak to’o loron 13 Maiu 2021 pasiente COVID-19 hamutuk 33 ne’ebé iha obstetrísia hamutuk ema na’in 11 no medisina interna hamutuk ema na’in 22.
Hosi pasiente ema na’in 11 iha obstetrísia kategoria moderadu no hot-hotu iha kondisaun estáve no ema na’in 22 ne’ebé iha medisina interna, ema na’in 8 kategoria grave no ema na’in 14 kategoria moderadu.
“Hosi 22 iha medisina interna, 8 grave (1 uza ventiladór, 2 uza CPAP, 5 uza oksijeniu) na'in 14 moderadu”, katak nia.
Totál komulativu kazu konfirmadu ne’ebé sura hosi 21 marsu 2020-13 maiu 2021) hamutuk rihun tolu atus ualu hitu nolu resin sia (3879), kazu rekoperadu iha loron 13 Maiu 2021 hamutuk 162 no kazu ativu hamutuk 1818.
Tuir dadus durante loron 6 Abril to’o 13 Maiu 2021 maizumenus timoroan ema na’in 7 mak mate ona ho COVID-19 ne’ebé kompostu hosi feto hamutuk ema na’in 3 no mane hamutuk ema na’in 4. (Editór, Zé Amaral).
