Díli-SMI: Líder nasional no fundador nasaun, Mari Alkatiri, fó atensaun ba Sentru Integradu Jestaun Krize – SIJK atu define didiak regra hodi aplika iha komarka sira iha rai-laran atu proteje sidadaun sira ne’ebé dadaun hela iha prizaun labele hetan afeita hosi surtu COVID-19.
“Husu ba CIGC atu define didi’ak regras ba proteje sira ne’ebé hela iha komarka hotu-hotu. Identika ona mós kazu infetadu barak tebes iha komarka Bekora”, dehan, Mari Alkatiri, iha Díli, Kinta, (13/05).
Líder ne’e preokupa ho situasaun sidadaun na’in 3 ne’ebé iha loron 13 Maiu mate inklui ho artista timoroan foinsa’e ida ho naran istimadu Juga Gama.
“Ohin deit sidadaun nain tolu maka husik mundu ida ne'e. Ida maka artista foinsa'e Ida. Identika ona mos kazu infetadu barak tebes iha komarka Bekora”, dehan, Alkatiri.
Eis Primeiru Ministru ne’e fiar katak hosi matebian na’in 2 ne’ebé mate ho COVID-19 ne’ebé lakohi kopera atu baixa iha sala izolamentu hada’et ona virus ba família no komunidade sira.
"(Sira matebian) rua infetadu ho COVID-19, sira la aseita no rejeita atu ba izolamentu. Ida fila ba nia uma iha Caicoli, ida seluk ba Liquiça. Rua ne'e hotu husik ona mundu ida ne'e. Maibe sira husik hela virus iha sira nia uma, ho sira ida-idak nia familia no vizinhos”, katak nia.
Tan-ne’e, eis Prezidente Autoridade RAEOA ne’e rekomenda ba SIJK atu kordena ho entidade seguransa no defeza, inklui autoridade komunitáriu atu impoin ka implementa Serka Sanitariu – SerSan iha suku, aldeia no bairru sira iha rai-laran.
“CIGC tenke koordena ho forsa seguransa no defeza no autoridade komunitária atu impoem serka apertadu iha sira ida-idak nia bairro, Suku ka Aldeia. Estadu tenke afirma nia autoridade uza verdade ka lia-loos sientífika”, tenik nia.
Durante fulan ida nia laran hahú sura hosi loron 6 Abril to’o 13 Maiu 2021 Governu liu-hosi Sentru Integradu Jestaun Krize – SIJK fó sai ona relatóriu ofisiál katak maizumenus timoroan hamutuk na’in 7 mak mate ona ho COVID-19 ne’ebé kompostu hosi feto ema na’in 3 no mane ema na’in 4.
Iha semana primeiru ka inisiu fulan Maiu 2021 ne’e maizumenus timoroan ema na’in 3 ne’ebé identifika mate ho COVID-19. (Editór, Caleri).