24
Thu, Jun
1 New Articles

Tama Ona Fulan 2, Governu Kontinua Laiha Dadus Fiksu Vítima Inundasaun

Komunidade iha kapitál Díli halai sai salva an wainhira mosu inundasaun iha loron 4 Abril 2021. Foto, Internete.

Flash News

Díli-SMI: Kuaze liu ona fulan ida resin dezde sura hosi loron 4 fulan Abril 2021 wainhira mosu inundasaun iha kapitál nasaun no munisípiu sira tanba impaktu hosi udan-boot maibe to’o ohin Governu seidauk iha dadus fiksu kona-ba totál vítima loloos hosi inundasaun refere.

Sekretáriu Estadu Protesaun Sivíl – SEPS, Joaquim Gusmão dos Reis, kontinua relata dadus provizóriu kona-ba vítima hosi inundasaun iha territóriu laran ba Primeiru Ministru – PM, Taur Matan Ruak, no seidauk iha dadus fiksu.

“Ohin ami mai hasoru señór Primeiru Ministru para update [atualiza] ba Primeiru-Ministru kona-ba situasaun iha kampu depois de dezastre akontese, update vitima dezastre naturais sira ba iha Primeiru Ministru no pasu saida mak bele halo.

“Dadus família sira ne’ebé afetadu hosi inundasaun iha teritóriu laran tomak, to’o a data hamutuk 32,288, maibé númeru ne’e sei provizóriu tanba dadus sei kontinua tama hosi autoridade lokál sira”, dehan, SEPS, Joaquim dos Reis, iha Rezidendia PM Farol, Segunda, (17/05).

Durante audensia ho Xefe Governu, SEPS, Joaquim Gusmão, esplika, apoiu umanitariu sira ba dadus provizoriu kona-ba komunidade ne’ebé afeitadu hosi inundasaun iha loron 4 fulan Abril foin lalais ne’e.

No, Governu kontinua hein reklamasaun hosi autoridade lokál sira karik komunidade balun ne’ebé sai vítima hosi inundasaun maibe seidauk to’o ohin loron seidauk hetan apoiu umanitariu nian.

“Kona-ba ajudu umanitáriu ba família afetadu sira iha Munisípiu kuaze kobre hotu ona tuir dadus ne’ebé iha, ho fasilidade elikópteru ida ne’ebé Governu aluga, no karik família afetadu sira ne’ebé seidauk simu bele halo reklamasaun liuhosi autoridade lokál atu Governu bele atende, tanba ne’e nu’udar obrigasaun Governu nian atu apoiu sidadaun sira ne’ebé afetadu”, tenik nia.

Iha parte munisípiu Díli nian rasik to’o ohin loron ajudu umanitáriu seidauk kobre hotu tanba númeru família afetadu boot tebes.

Maske nune’e, Governu liu-hosi parte SEPS sei kontinua esforsu hodi konklui apoiu umanitariu ba vítima sira ne’ebé hetan impaktu hosi inundasaun iha tempu badak nia laran.

Tuir dadus prelimanáriu ne’ebé ekipa tarefa verifika no rekoilla iha teritóriu laran hosi impaktu inundasaun iha loron 04 Fevereiru 2021 hatudu katak totál infra-estrutura hamutuk millaun $225 mak hetan estragus. (Editór, Caleri).

 

Pin It

Follow us on Twitter

Sign up via our free email subscription service to receive notifications when new information is available.