Laivai-SMI: Anin boot ne’ebé akontese orseik (27/05) iha aldeia Vaniria, Suku Eukisi, Postu Antigu Laivai no atualmente tama iha Postu Administrativu Lautém, Munisípiu Lautém konsege estraga uma feto-faluk ida ho naran Celestina de Jesus Monteiro, tanba ai-hun boot tohar hodi hanehan uma refere.
Aleixo de Jesus, nu’udar reprezentante família, hateten, iha loron 27 parte lorokraik mosu anin boot ne’ebé rezulta ai-tohar hodi monu no hanehan uma feto-faluk ne’ebé durante hamahon nia.
“(Orseik), kinta-feira (27/05) mosu anin boot ne’ebé rezulta ai-hun boot ida monu hanehan uma ida (hetan) estragus iha aldeia Vaniria, Suku Eukisi, Munisípiu Lautém. Uma na’in faluk ida ho naran Celestina de Jesus Monteiro”, dehan, Aleixo de Jesus, iha suku Eukisi, Sexta, (27/05).
Aleixo de Jesus, hatutan, nia kontaktu kedan parte autoridade lokál suku Eukisi nomós parte dirasaun Ministériu Solidariedade Sosiál – MSS munisípiu Lautém kona-ba akontesementu refere.
Tanba uma hetan estraga totál mak feto faluk Celestina de Jesus dadaun ne’e hela ho nia oan mane ho naran Abrão da Costa, iha aldeia Vaniria, suku Eukisi.
“Orseik ha’u mak telefone no manda ona fotografia (uma hetan estragus) ba MSS munisípiu liu-hosi whatsapp. Dadaun ne’e ferik hela iha nia oan mane Abrão tanba uma hetan estraga totál”, tenik, Aleixo.
Wanhira parte SMI konfirma ba Diretúr Sentru Solidariedade Sosiál Munisípiu Lautém, Paulo da Silva Pinto, rekuiñese katak simu duni informasaun kona-ba vitíma dezastre naturais (anin-boot) ne’ebé akontese iha aldeia Vaniria, suku Eukisi.
Relasiona ho asuntu refere, Paulo da Silva, esklarese, ona informasaun ba parte kompetente hanesan parte Protesaun Sivil atu bele fó apoiu lalais ba feto-faluk ne’ebé sai vitíma ba anin boot foin lalais-ne’e.
“Serbisu ida-ne’e bazeia ba Dekretu Lei Nú. 03/2016 (no) entrega ona ba munisípiu no autoridade ne’ebé mak responsavél, sira parte protesaun sivil mak toma konta”, katak, Paulo.
Iha parte seluk, Diretúr Asaun Sosiál no Jestaun Dezastre Naturais Munisípiu Lautém, Agostinho dos Santos Ramos, esplika, autoridade munisípiu Lautém liu-hosi dirasaun dezastre naturais, ohin (28/05) orienta ona ekipa hodi fó apoiu emerjénsia hanesan nesesidade baziku ba vitíma feto-faluk Celestina de Jesus, iha aldeia Vaniria, suku Eukisi.
“Ohin, ha’u orienta ona ekipa ida hodi lori nesesidade baziku hodi apoiu ita nian inan faluk ne’ebé sai vitíma ba dezastre naturais (anin-boot) orseik. Sasan baziku sira mak hanesan foos, mina, supermi no sasan seluk hanesan lona, biti no sasan dapur nian”, tenik, Agostinho Ramos.
Kona-ba uma ne’ebé hetan estragus, Agostinho dos Santos Ramos, esplika, Governu iha protidaun atu ajuda inan-faluk ne’ebé uma hetan estragus.
Maibe, nia hatutan, sei hein relatóriu hosi ekipa tekniku atu identifika grau estragus antes halo desizaun hodi fó apoiu ba inan-faluk refere.
“Kona-ba uma, ekipa tekniku ohin dadersan (27/05) tun ona ba fatin akontesementu hodi halo indentifikasaun kona-ba grau ka tipu de estragus. Governu prontu apoiu maibe presiza bazeia ba dadus kona-ba tipu de estragus, se uma hetan estragus totál mak sei fó apoiu tuir estragus totál ne’e”, dehan nia.
Antes remata entrevista, Ramos, klarifika, modalidade ka kuantidade sasan kona-ba apoiu emerjénsia ne’ebé fó ba inan-faluk Celestina de Jesus hanesan mós sasan ne’ebé vitíma dezastre naturais seluk simu durante ne’e iha munisípiu Lautém. (Editór, Lariwa).
