Díli-SMI: Governu Timor-Leste liu-hosi Ministériu Negósiu Estrajeiru no Kooperasaun – MNEK dadaun ne’e hala’o hela planu atu partisipa simeira Komunidade País Língua Português (CPLP-sigla Portugues) ne’ebé sei realiza iha nasaun Angola, iha fulan juñu tinan ida-ne’e.
Nune’e, Ministra Negósiu Estranjeirus no Kooperasaun, Adaljiza Albertina Xavier Reis Magno, hahú halo ona diskusaun ho Primeiru Ministru, Taur Matan Ruak, kona-ba lala’ok partisipasaun Xefe Governu no Xefe Estadu iha semeira CPLP refere.
“Ami ko’alia liu asuntus kona-ba ita atu iha reuniaun Simeira CPLP ne’ebé mak sei akontese iha Angola fulan oin iha Jullu ne’ebé haree sei disponibilidade señór Primeiru-Ministru nian sei bele ba ka lae ho señór Prezidente Repúblika”, dehan, Ministra, Adaljiza Magno, iha Faról – Díli, Tersa, (08/06) hafoin hala’o audénsia ho PM, Taur Matan Ruak.
Durante enkontru ne’e mós parte MNEK ninia preparasaun kona-ba toma-pose reprezentante Timor-Leste ne’ebé atu sai Sekretáriu Ezekutivu ba CPLP nian ba periodu tinan 2 oin-mai.
“Ami organiza hela ida ne’e í depois ko’alia kona-ba preparasaun señór Zacarias Albano da Costa, ne’ebé mak atu ba sai Sekretariu Ezekutivu ba CPLP nian, reprezenta Timor pelo primeira vez”, katak, Magno.
Hosi rezultadu enkontru ne’e katak Xefe Governu sei la partisipa iha semeira CPLP refere nune’e parte MNEK kontinua komunika ho Xefe Estadu, Francisco Guterres “Lú Ólo” atu disponivél hodi tuir eventu importante refere.
“Xefe Governu provavelmente sei la partisipa, enkuantu hein resposta Xefe Estadu nian atu partisipa Simeira refere, tanba iha okaziaun Simeira ne’e, sei toma-pose mós ba Sekretáriu Ezekutivu foun CPLP nian ne’ebé mai hosi Timor-Leste”, tenik nia.
Governu konsidera simeira CPLP ba tinan ida-ne’e importante tebes tanba atu diskute kona-ba asuntu mobilidade no sirkulasaun sidadaun CPLP iha nasaun sira ne’ebé ko’alia lian Português
Liu-liu oinsa bele garante estudante timoroan ne’ebé hala’o estudu iha nasaun CPLP la-presiza halo vistu hodi nune’e bele fasilita estudante hala’o estudu ho di’ak. (Editór, Caleri).