Vikeke-SMI: Atu hametin no fortifika kualidade serbisu advokásia hosi membru rede hosi sosiadade sivil nian, Fundasaun Knua Haberan Komunidade – F-KHC realiza formasaun jornalizmu nian kona-ba oinsa hakere notisia hodi bele kontribui ba efetividade serbisu iha futuru.
“Formasaun ne’e mak atu kapasita membrus réde advokásia iha nivél munisípiu no halo planu asaun ba servisu advókasia atu nune’e bele halo servisu ho efetivu liu-tan liu-liu halo advokásia ba dezenvolvimentu nivél munisipiu nian’, dehan, Diretúr Ezekutivu Fundasaun KHC, Agosto Pinto, Segunda, (14/06) hafoin halo abertura formasaun iha Vikeke.
Formasaun ne’e involve hosi grupu foinsa’e sira no organizasaun ne’ebé ninia baze iha komunidade hodi hetan kuiñesementu naton iha área jornalizmu hodi nune’e bele ajuda iha serbisu advokásia nian.
“Formasaun ne’e envolve grupu juventude no Community Based Organization ( CBO ) sira ho objetivu ida mak atu fahe informasaun no eleva kapasidade sira nian hodi hala’o serbisu advókasia ho efesiénsia no efetivu liu tan”, dehan Agosto.
Iha biban hanesan, Ivia Carvalho, nu’udar partisipante iha formasaun jornalizmu nian refere sente orgullu tanba ho liu-hosi atividade kapasitasaun ne’e bele aumenta kuiñesementu joventude sira.
Nune’e, nia parte kontinua dezafia Fundasaun KHC atu nafatin fahe informasaun relasaun ho advokásia ba foinsa’e sira no rede organizasaun komunitáriu nian iha futuru.
“Sente kontente tebes ho formasaun ida ne’e, tanba liu-hosi formasaun ne’e bele kapasita liu-tan juventude sira kona-ba servisu iha advókasia nian.
“Husu ba fundasaun iha futuru atu nafatin partilla informasaun kona-ba advókasia nian ba joventude sira la’os ba membrus réde advókasia de’it maibé mós ba juventude sira iha nivél sukus no iha areá rural”, tenik Ivia.
Partisipante sir aba formasaun ne’e kompostu hosi voluntariu sosiadade sivil sira mak hanesan organizasaun Rais Hadomi Timor Oan (RHTO), Knua Haberan Komunidade (KHC), Sentru Estudu Desenvolvimentu Viqueque (SEDV), MISSION TIMOR, Knua Hadomi Futuru (KHF), Centru Joventude Viqueque (CJV) no Radiu Povu Viqueque (RPV).
Formasaun kona-ba oinsá atu hakerek notisia tuir estandar jurnalismu nian ne’e fasilita hosi Jestór Rádiu Povu Viqueue – RPV, Florindo Tilman. (Editór, Caleri).
