Díli-SMI: Xefe Estadu Maior Jenerál, Tenente Jenerál, Lere Anan Timur, hatete, Governu labele fó tender ba kompañia privadu sira manan hodi halo akizasaun ka fornese ekipamentu funu ba instituisaun Falintil Forsa Defeza Timor-Leste – F-FDTL tanba bele hamosu impaktu ladi’ak iha futuru.
Fornesementu ekipamentu milítar hanesan material funu nian di’ak liu instituisaun F-FDTL hetan fornese direta hosi fabrika ka produtór hodi bele evita hahalok ne’ebé bele estraga estabilidade nasionál no korupsaun iha prosesu akizasaun material funu nian ba milítar.
“Ha’u hateten ba Señor Prezidente da-Repúblika para hato’o ba Señor Primeiru Ministru katak ba Instituisaun Militar, ba material militar, ha’u lakohi fó ba kompanias. Instituisaun direta ba fábrikas.
“Ne’e la’os sosa hahan ga, ou sosa saida mak ita tender, tender, ne’e material-de-guerra, kilat, kilat-musan, buat sira ne’e ita tenke ba direta. Instituisaun ho fabrika ou Governu ho fábrika. Ida ne’e mak diak liu”, dehan, Tenente Jenerál, Lere Anan Timur, iha Palásiu Prezidensiál Nicolau Lobato hafoin halo enkontru semanal ho Prezidente Repúblika, Francisco Guterres ‘Lú Ólo’, Kuarta, (23/06).
Tuir lider instituisaun F-FDTL ne’e katak, sasan ka ekipamentu milítar ne’e sensitive tebes ne’ebé presiza kuidadu iha prosesu indika kompañia privadu atu hatama material funu nian ba instituisaun F-FDTL.
Nune’e mós, hapara mekanizmu tenderizasaun ba kompañia atu hatama material milítar bele evita mós aktu korupsaun hosi membru F-FDTL ne’ebé iha interese balun ho prosesu tender refere.
“Ha’u konsidera material hirak ne’e sensivel, mós atu evita prátika korupsaun. Dala ruma ita iha interese iha laran. Tender ne’e para pursentu ne’e tama.
“Ida-ne’e ha’u kontra kedas. Ba ha’u nia instituisaun, ha’u hateten, imi ida hanesan ne’e, ohin kedas ha’u duni sai imi. Iha ne’e, para ita servi instituisaun la’os lori instituisaun serve fali ita-nia interese”, katak nia.
Durante enkontru, Komandante Jerál F-FDTL ne’e mós ko’alia kona-ba kondisaun infrastrutura no rekrtutamentu ba membru foun F-FDTL hamutuk 600 ne’ebé ninia prosesu sei termina iha fulan Agostu tinan ida-ne’e.
Xefe Estadu nomós Komandante Supremu Forsa Armada F-FDTL husu ba Xefe Estadu Maior Jenerál atu halo jestaun no kontrolu ba membru milítar sira hodi nune’e labele la’os ses hosi lei no orden.
Sosiadade sivil hanesan Fundasaun Mahein – FM ne’ebé durante ne’e tau matan ba asuntu defeza no seguransa mós dala barak ona husu Governu atu harii kompañia Estatal ida hodi fornese ka halo akizasaun material funu nian ba milítar no polísia. (Editór, Caleri).
