Balibo-SMI: Politika Governu hodi responde ba variante Delta COVID-19 ne’ebé dadaun afeita maka’as nasaun vizinu Indonézia halo Instituisaun Polisia Nasional Timor-Leste – PNTL hamutuk ho Falintil Forsa Defeza Timor-Leste – F-FDTL sei halo patrolla rutina iha liña fronteira hodi evita movimentu ema ilegál ne’ebé bele lori transmisaun variante Delta COVID-19 mai rai-laran.
Vise Ministru Interior, António Armindo, hateten, liña fronteira nu’udar fatór ida ne’ebé bele kontribui ba transmisaun variante Delta COVID-19 tanba área fronteira trestre besik loos nasaun viziñu Indonézia nian.
“Ita hatene área fronteira (Derok Ren) ida-ne’e maka dala wain komunidade sira uza hodi halo movimentu ilegál tanba besik kedas área fronteira terrestre ho nasaun viziñu Indonezia nian”, dehan, Vise Ministru Interiór, Antonio Armindo, wainhira hala’o vizita ba postu UPF Derok Ren, Suku Cova, Munisípiu Bobonaro foin lalais ne’e.
Konsidera variante delta ne’e perigu tebes ba ema nia vida nune’e presiza halo seguransa masimu iha área fronteira atu bele evita movimentu ilegál tama mai Timor-Leste hodi transmite moras at refere.
“Ita hotu hatene katak variante virus foun ne’e perigu tebes, atu evita tama ba ita-nia nasaun ita tenke servisu hamutuk hodi reforsa seguransa iha fronteira liuhosi operasaun no halo patrullamentu konjunta ho ita nia forsa defeza iha fronteira.
“Hodi kontrola movimentu ilegál no prevene propagasaun COVID-19 no kontinua sosializa informasaun ba populasaun iha liña fronteira hodi evita halo kontaktu ho komunidade sira husi Indonézia”, tenik nia.
Tuir nia, durante ne’e komunidade sira halo viajen ilegál tama husi fronteira Atambua, Indonézia liu fronteira Batugadé, Covalima no Oe-Cusse tanba ne’e Guvernu sei foti medida tau atensaun ba fronteira hotu hodi kria kondisaun ba membru sira ho ekipamentu prevensaun COVID-19 nian.
Iha okaziaun vizita ne’e, Governante ne’e mos husu ba membru UPF sira atu hametin liña koordenasaun ho autoridade munisípiu no komunidade sira atu nune’e bele kontrola di’ak liu-tan movimentu ilegál hodi evita tranzmisaun COVID-19 variante foun ne’e tama mai nasaun Timor-Leste. (Editór, Caleri).
