DILI – SMI, Planu Polisia Nasional Timor-Leste – PNTL atu kaptura joven namora iha fatin sagradu sira hamosu hanoin pro-kontra iha sosiadade nia leet. Parte Igreja konkorda hodi kaptura joven sira namora, maibe parte Parlamentu Nasional – PN no sosiadade sivil kontra.
Planu PNTL ne’e liu husi deklarasaun Segundu Komandante PNTL Munisipiu Dili, Superintendente Asistente, Euclides Belo iha tinan kotuk relasiona ho aktu joven sira ne’ebé dala-barak halo namora iha fatin sagradu sira hanesan area Estatua Kristu Rei no Joao Paulo II Tasi-tolu.
Tuir Euclides katak estatua fatin hirak ne’e nu’udar fatin sagradu ne’ebé merese ba públiku atu halo orasaun la’os atu halo namora.
“Fatin sagradu merese ba ema hotu atu halo orasaun hodi adora tamba ita nia kultura ka lei maioria ema sarani katolika ita tenki reza ba ita nia estutua tamba fatin sagradu ita konsidera mos sai hanesan igreja”, dehan Euclides wainhira halo intervista ho SMI iha nia serbisu fatin Kaikoli, Kinta, (09/11).
Belo mantein ho ninia deklarasaun katak sei kaptura joven sira ne’ebé namora iha fatin sagradu sira hodi evita aktu krime iha fatin hirak ne’e. “ Polisia bandu ona maibe sidadaun ne’ebé maka kontinua ho atitude refere parte PNTL impoin sei toma medida, kaptura no entrega ba inan aman, polisia bandu hahalok hirak ne’e, nune’ee bele evita krime refere”, tenik nia.
Parte igreja ne’ebé SMI konfirma liu husi Reitor Seminariu Maior Fatumeta, Pe. Eduardo de Almeida konkorda ho planu PNTL hodi halo kapturasaun ba joven sira ne’ebé gosta namora iha fatin sagradu sira tanba konsidera nu’udar asaun eduka joven sira tau respeita fatin sagradu sira.
“Ida ne’e hau hanoin la’os bandu, atu fo hanoin ka hanoris joven sira nune’e bele respeita fatin sagradu sira. Hau hanoin ne’e mós maneira diak atu eduka ita nia joven sira”, dehan Pe. Eduardo durante intervista ho SMI iha nia serbisu fatin Fatumeta, Tersa, (26/12).
Iha parte seluk, reprezentante povu iha Parlamentu Nasional – PN, Fidelis Magalhaes deskonkorda ho PNTL no Igreja kona-ba kaptura joven sira ne’ebé halo namora iha fatin sagradu sira.
Tuir Xefi Bankada Partidu Libertasaun Popular – PLP ne’e katak wainhira atu kaptura sidadaun ruma tenki bázea ba lei tanba Timor-Leste nu’udar nasaun demokratiku ema hotu iha diretu atu hetan Liberdade ba movimentu.
Eis Xefi Casa Sivil ne’e mós komenta katak seidauk iha lei ida ne’ebé regula kona-ba ema namora, tanba ne’e PNTL presiza define didiak antes hasai deklarasaun ruma kona-ba asuntu refere.
“Wainhira kolia kona-ba namora hau sedauk haree lei kona-ba ida ne’e tamba waihira tau ba lei karik ita tenki difini lai saida maka namora no nmora oinsa. Ne’eduni hau seidauk bele hateten so polisia maka bele hatene halo deklarasaun. Maibe bázeia ba lei ida, waihira komunidade halo keixa ida ne’e mai ami komisaun B sei haree viola lei ida ne’ebé depois ami sei halo levantamentu ba dadus hirak ne’e merese duni hetan kapturasaun galae? Ne’eduni husu ba polisia sira hare ho didiak”, dehan Fidelis iha PN wainhira SMI husu ninia hanoin kona-ba deklarasaun husi Segundu Komandante PNTL Munisipiu Dili nian.
Hanoin deskonkorda mós mai husi sosiadade sivil Fundasaun Mahein – FM ne’ebé durante tau matan ba asuntu defeza no siguransa kona-ba deklarasaun Segundu Komadante Munisipiu Dili kona-ba atu halo kapturasaun ba joven sira ne’ebé halo namora iha fatin públiku.
Tuir Adjuntu Diretúr FM, João Almeida katak Timor-Leste nu’udar nasaun demokratika sidadaun hothotu iha diretu atu hetan Liberdade, tanba ne’e polisia atu halo kapturasaun ba ema ne’ebé halo namora iha fatin sagradu tenki bázea ba lei.
“Ita nia nasaun estadu demokratiko ema hotu iha diretu atu hetan liberdade signifika polisia atu kaptura sidadaun ne’ebé namora iha fatin sagradu tenki ho lei. Timor-Leste estadu de direitu, polisia foti medida saida deit ne’ebé polisia halo tenki tuir lei”, dehan Almeida.
João mós fo nia argumentu katak deklarasaun segundu komadante PNTL munisipiu Dili ne’e laiha báze fundamentu tanba sidadau sira ne’ebé tur iha fatin sagradu sira la’os deit joven sira ne’ebé halo namora maibe mós ema ho familia ka kolega sira ne’ebé halo pasa ferias iha fatin refere.
“Regra refere laiha báze fundamentu ida ne’ebé PNTL halo atu kaptura kualker sidadaun tur iha fatin sagradu ou fatin diverti, la’os ema namora deit maka ba maibe mos ema ho familias kolegas sira ba pasa ferias ou pasiar”, dehan observador asuntu defeza no siguransa ne’e. (Ynha, Izu, Caldas, Faustina/SMI).