Dili – SMI, Aktu membru Polisia Nasional Timor Leste – PNTL ne’ebé durante ne’e kontinua viola tranzitu hanesan la tau kapasete hodi lori motor iha estrada públiku hodi sai preokupasaun públiku iha média sosiál, tuir Fundasaun Mahein – FM katak hahalok membru membru polisia hirak ne’e la eduka.
“Tuir buat ne’ebé maka polisia bele halo ne’e iha lei no orden. Se wainhira polisia sira maka halo servisu sira hanesan ne’e signifika katak la eduka”, dehan Kordenador Peskiza FM, Sancho Xavier ba SMI durante intervista iha serbisu fatin, Fomentu I, Kuarta, (29/11).
Tuir peskizador ne’e katak membru PNTL tenki kumpri ba lei ne’ebé mak iha atu nune’e bele eduka sidadaun no liu-liu joven sira nune’e hodi bele asegura movimentu iha estrada publiku, la’os viola fali lei tranzitu nian.
Parte Komandu Polisia Tranzitu ne’ebé SMI konfirma defende an hodi klarifika katak instituisaun polisiál la haruka ninia membru sira atu halo movimentu iha estrada públiku ho motorizada tuir sira nia hakarak, maibe presiza kumpri regra tranzitu nian.
Tanba ne’e, Diretúr Polisia Tranzitu Nasional, Inspetór Xefi António L.C. Soares apela ba públiku no ajente mídia sira atu hato’o keixa ba dirasaun komandu karik hetan membru polisia sira viola tranzitu.
“Hau atu hatete deit katak instituisaun PNTL mos nia la hanorin ba nia membru sira tantu husi tranzitu nian ka PNTL se deit katak atu viola lei kodigu estrada. Maibe hau husu ba publiku no mídia sira karik bainhira hetan hanesan ne’e halo favor hato’o faktus ba komandu diak liu tan ami agradese”, Dehan Inspetór Antonio.
Iha intervista ketak ne’ebé SMI halo ho membru Komisaun B Parlamentu Nasional - PN rasik lahatene tanba seidauk simu keisa formal husi komunidade.
“Komisaun B seidauk simu keisa ruma husi komunidade sira kona-ba kestaun ida ne’e. Laiha to’o agora kona ba ida ne’e, se ami seidauk rona hanesan ita dehan ne’e, ita ohin foin husu i levanta ida ne’e ami seidauk rona keisa formal ruma ou keisa ruma”, Esplika Prezidenti Komisaun B PN, Fidelis Magalhaes iha PN, Sexta, (30/11) wainhira SMI husu nia observasaun ba hahalok membru PNTL ne’ebé viola lei tranzitu ne’e.
Fidelis aprezenta nia argumentu katak wainhira seidauk iha keixa formal husi komunidade ba Komisaun B PN maka sei la fo samada atensaun ba komandu jerál PNTL. Tanba publikasaun informasaun iha mídia sosiál susar atu fiar ninia verasidade.
“Hau hanoin ida ne’e tenki iha karta formal, públiku ka komunidade sira bele halo keisa formal ida mai komisaun, ami sei fo xamada, ami sei konvoka PNTL atu rona sira I depois atu sujere para meius hotu-hotu, bele halo serbisu diak. Mídia online sira ne’e susar ba ita atu hatene, tamba ida ne’e ita le’e ema ida komentariu”, tenik eis Casa Sivil ne’e.
Tuir observasaun SMI katak durante ne’e membru instituisaun PNTL dala-barak lori motor la uza kapasete, para iha zebra cross nomós para kareta no motor la tuir regra tranzitu nian.( Aquino, Sandra, Indah/SMI).
