TMR: PR Sei Fó Pose Membru Governu Pendente

Primeiru Minstru, Taur Matan Ruak. Foto, Mídia PR.

Reportagen Klean
Typography

Dili-SMI, Primeiru Ministru-PM, Taur Matan Ruak, afirma, Prezidente-da-Repúblika, Francisco Guterres “Lú Olo” sei aranja tempu hodi fó tomada-de-posse ba kandidatu membru VIII Governu konstitusional ne’ebé sei pendente to’o ohin loron.

“Ho Xefe-de-Estadu mós ko’alia oituan kona-ba ministrus balu ne’ebé seidauk simu tomada-de-posse, nune’e iha tempu tuir mai Prezidente-da-Repúblika sei aranja tempu hodi fó tomada-de-posse ba membrus Governu hirak ne’e”, dehan PM Taur, iha Palasiu Prezidensiál Aitarak-Laran, Kinta, (09/08) hafoin remata enkontru semanál ho Xefe-de-Estadu.

TMR mós esplika, enkontru semanál ho Xefe-de-Estadu hodi informa kona-ba funsionamentu VIII Governu liu-liu atividade Governu ne’ebé durante hala’o inklui    koalia kona-ba Orsamentu Jerál Estadu – OJE 2018 nian.

“Ne’e ha’u nian enkontru semanál no Nai-Prezidente-da-Repúblika liuliu informa saida mak ami halo kona-ba Orsamentu Jerál-du-Estadu no atividades sira ne’ebé Governu hala’o”, tenik lider Partidu Libertasaun Popular – PLP ne’e.

Eis Komandante Supremu ne’e mós esplika, kandidatu membru Governu na’in tolu hanesan Alfredo Pires,  Rogéiro Mendonça no Samuel Marçal laiha ona problema atu hetan tomada-de-pose.

Tuir observasaun SMI hatudu katak durante semana ne’e mosu tensaun iha públiku kona-ba membru VIII Governu ne’ebé to’o ohin loron seidauk hetan tomada-de-pose husi Xefe-de-Estadu.

Iha loron tersa (07/08) foin lalais ne’e, militante no simpatizante hamutuk Kordenador Partidu CNRT husi munisipiu 12 inklui Rejiaun Autonónumu Oe-Cusse hala’o konfrensia imprensa hodi fó ultimatum ba Prezidente-da-Repúblika durante loron 10 nia laran atu fó toma pose ba membru kandidatu Governu ne’ebé pendente hela.

Kordenador partidu CNRT husi munisipiu sira ne’e husu atu Prezidente Lú Olo atu hala’o ninia knár tuir konstituisaun RDTL nu’udar Xefe-de-Estadu ba povu tomak, la’os prezidente partidu FRETILIN nian.

“Husu ba Señor Francisco Guterres Lú Olo atu komporta ninia desizaun sira nu’udar Prezidente-da-Repúblika, laós Prezidente Partidu FRETILIN nian”, deklara husi Kordenador Partidu CNRT husi munisipiu 13 liu husi komunikadu Imprensa ne’ebé públika iha pajina AMP nian.

Kordenador partidu CNRT husi munisipiu tomak konsidera katak formasaun VIII Governu ne’ebé to’o ohin loron paradu hela tanba aktu inresponsabilidade husi Xefe-de-Estadu nian ne’ebé viola prinsipiu separasaun poder tuir konstituisaun haruka no hakanek segredu justisa.

Relasiona ho grupu partidu CNRT ne’ebé fó ultimatum ba Prezidente-da-Repúblika, Francisco Guterres “Lú Olo”, Maijór-Jenerál Lere Anan Timur, apela ba públiku atu labele halo presaun ba líder orgaun soberanu sira.

“Ha’u nu’udar elementu ba seguransa, seguransa ba órgaun soberanu haat hotu, ba nasaun tomak, órgaun hat ne’e mak reprezenta estadu, nasaun Repúblika Demokratika Timor-Leste, ha’u dehan iha Timor la iha ema ida que boot liu Prezidente-da-Repúblika. Ha’u apela ba Timor oan sira lalika presiona órgaun soberanu sira, sira iha sira nia kompetensia rasik atu uza,” dehan Maijor Jenerál, Lere Anan Timur.

Maijór Jenerál, fó razaun katak kandidatu membru Governu ne’ebé seidauk hetan pose ne’e nu’udar sidadaun ne’ebé hetan fiar husi Primeiru Ministru atu asumi kargu ruma iha Governu, maibe Prezidente-da-Repúblika eleitu demokrátiku husi povu Timor-Leste liu husi eleisaun jerál 2017.

Tanba ne’e, lider militar ne’e la aseita ba kualker aktu husi grupu atu halo presaun ka halo asaun demonstrasaun hasoru Prezidente-da-Repúblika ne’ebé bele hamosu situasaun ladiak iha rai-laran.

Kandidatu membru Governu hamutuk na’in sia (9) ne’ebé to’o ohin loron seidauk hetan tomada-de-posse deskonfia involve iha kazu korupsaun. (Editor, Lariwa).