26
Fri, Apr
0 New Articles

Arepende, AMP Husu Vota Fila Fali Viazen PR ba Vatikanu

Sesaun votasaun iha plenaria PN. Foto, Internete.

Reportagen Klean
Typography

Díli-SMI, Hanesan arepende ho aktu vota kontra iha loron (5/11) hodi kansela viazen Prezidente-da-Repúblika ba Vatikanu, lider sira AMP orienta deputadu no deputada bloku AMP atu realiza votasaun sentimentu ba dezlokasaun Xefe-de-Estadu, Francisco Guterres “Lú Olo”  ba Vatikanu.

Liuhosi Prezidente Bankada Partidu CNRT, Duarte Nunes, klárifika, planu tau ajenda halo diskusaun kona-ba viazen PR ba Vatikanu ne’e rezultadu hosi konsultasaun entre lider AMP durante ne’e.

“Ita tau ajenda ba debate kona-ba viazen prezidente nian ba liur, ba Roma atu esplika deit katak iha momentu ne’ebé realmente iha isu karik iha hanoin ruma maibe ita hotu hatene katak AMP la’os partidu ida, partidu tolu ne’ebé nia lideransa sira mós presiza konsulta malu ne’ebé ikus mai ami hetan informasaun hosi Konsellu AMP katak iha ona mudansa kona-ba asaun sentimentu viazen prezidente nian ba roma”, esplika Duarte Nunes, liuhosi Plenaria iha PN, Tersa, (13/11).

Duarte Nune’e, reforsa, razaun AMP husu atu vota fila fali viazen PR ba Vatikanu ne’e tanba ajenda vizita Xefe-de-Estadu no loron audénsia ho Santo Padre sei iha tempu ne’ebé sufisiente.

“Ita haree prezidente nia vizita marka ba dia 17 iha audénsia ne’e dia 20 ho ital Santo Padre, ne’ebé ami hanoin tempu sei iha I ami husu prezidente atu konsidera ami nia sujestaun”, dehan Deputadu partidu CNRT ne’e.

Biban hanesan, Vise Prezidente Bankada PLP, Atuál Primeira Vise Prezidente Parlamentu Nasional – PPN,  Maria Angelina Sarmento, konfirma, maske seidauk ko’alia iha nivél konfrensia lider bakada sira maibe bankada AMP konkorda atu halo votasaun fila fali dezlokasaun PR ba Vatikanu.

“Em nome de bankada PLP ami hakarak mós sekunda proposta hosi prezidente da bankada CNRT nian sobre inkluzaun iha ajenda ba sentimentu dezlokasaun Prezidente-da-Republika nian, mesmo que iha konferensia lideres bankadas ita la ko’alia kona-ba ida nee, maibe iha konkordansia hosi AMP nian inklui mos iha agenda ita bele halo votasaun sentimentu dezlokasaun ba Vatikanu”, Dehan Maria Angelina.

Maske nune’e, Partidu opozisaun iha Parlamentu Nasional hanesan FRETILIN rejeita pedidu bankada Governu hodi loke fila fali debate hodi halo votasaun sentimentu kona-ba dezlokasaun Xefe-de-Estadu ba Vatikanu.

Xefe Bankada opozisaun FRETILIN, Aniceto Guterres, hateten, wainhira órgaun soberania ida foti desizaun labele fila fali ba kotuk no atu halo votasaun foun, tenke liu hosi pedidu foun husi Prezidente-da-Repúblika.

No, Aniceto, afirma, wainhira AMP hakarak uza forsa maioria iha PN hodi impoin ba diskusaun votasaun ba viazen PR nian mak bankada FRETILIN sei sai hosi plenária.

“Se AMP uza ninia maioria ne'e atu impoin diskusaun ne'e iha Parlamentu, ankada FRETILIN sei retira husi plenária”, dehan Eis Prezidente PN iha IV lejizlatura ne’e.

Relasiona ho aktu vota kontra viazen PR ba estranjeiru hosi bankada AMP iha PN ne’e hamosu pro-kontra iha sosiadade nia leet. Liu-liu lider sira hanesan Xanana Gusmão no Ramos Horta mós fó ninia hanoin ne’ebé diferente kona-ba rezultadu vota kontra viazen Xefe-de-Estadu ba estranjeiru nian.

Eis Primeiru Ministru no Atúal Prezidente Partidu CNRT, Kayrala Xanana Gusmão, apoiu vota kontra hosi bankada AMP tanba konsidera vota kontra ne’e tuir konstituisaun.

Iha parte ketak, eis Prezidente-da-Republika, José Ramos Horta, la konkorda ho membru PN hosi bankada AMP ne’ebé vota kontra viazen Xefe-de-Estadu no husu orgaun soberania sira presiza respeitu malu hodi hatudu ezemplu diak ba povu Timor-Leste.

Antes ne’e, rezultadu votasaun kona-ba viazen PR ba Vatikanu ne’e, hetan vota kontra hamutuk 35, vota a favor hamutuk 26 no abstensaun 0. (Editor, Lariwa).

Pin It

Follow us on Twitter

Sign up via our free email subscription service to receive notifications when new information is available.