Díli – SMI, Dosente Fakuldade Direitu Universidade da Paz – UNPAZ, Octavio da Conceição, afirma, atu reduz númeru dezempregu iha rai-laran, Governu presiza investe maka’as iha setór prodútivu no privadu la’os haruka timoroan ba serbisu iha estranjeiru hanesan Koreia no Australia.
Tuir akdémiku ne’e nia obervasaun katak to’o ohin loron Governu seidauk kria investimentu boot iha area prodútivu tanba ne’e mak labele rezolve problema dezempregu iha rai-laran.
“Seidauk halo investimentu ne’ebé boot iha rai-laran tantu husi investor internasionais no nasionais ne’ebé investe iha areia produtivu sira tanba ne’e problema dezempregu labele hadi’a no atu rezolve problema dezempregu mak governu tenke investe maka’as ba setór prodútivu”, dehan Octavio ba SMI iha nia knar fatin Manleuana-Dili, Kuarta, (27/02), foin lalais ne'e.
Ho nune’e, tuir nia Governu presiza halo investimentu ba area prodútivu hanesan Agrikultura no setór privadu liu-liu kompañia sira iha futuru hodi kria oportunidade serbisu ba sidadaun sira par abele reduz númeru dezempregu iha rai-laran.
Iha parte seluk, Sindikatu Jeral Trabalhadores-Timor Leste - SJT-TL, Alvaro Vila Nova, argumenta, governu presiza kria polítika ne’ebé diak, atu dda investor estrangeiru sira mai TL hodi fó servisu ba sidadaun sira ne’ebé dezempregadu hela.
Hodi fasilita ida ne’e, tuir Alvaro, Governu persiza hadi’a prosesu birokrasia, prosesu judisiáriu no lei investimentu rasik ne’ebé ladun akomula interese investor estranjeiru sira atu mai investe iha rai-laran.
“Ami mós simu komplein husi empregador sira, no investor ka empreza sira kona-ba prosesu rejistrasaun ba sira nia investimentu ne’e, sira hakarak la’o fasil, sira lakohi prosesu birokrasia ne’e la’o naruk”, tenik nia
Atu solusiona problema hira ne’e, Sekretariu Estadu Formasaun Profesional Empregu - SEFOPE, Julião da Silva, hateten, tinan ida ne’e governu foku liu atu hasa’e abilidade ba sentru formasaun sira.
Ho nune’e bele mellora kualidade servisu no investe ba setór privadu sira atu fó servisu ba traballdor sira ne’ebé formandu ona iha sentru formasaun sira nune’e bele reduz dezempregu iha rai-laran.
“Planu SEFOPE ba tinan ida ne’e foku liu atu hasae abilidade liu-liu iha sentru formasaun sira atu hasa’e kualidade servisu”, katak nian.
Durante ne’e públiku kestiona kona-ba promesa Governu iha tempu kampañia ne’ebé sei fó empregu ba timoroan maizumenus ema na’in rihun neen nolu (60.000) kada tinan. (Editor, Lariwa).