Covalima-SMI: Diretúr Serbisu Saúde Munisípiu Covalima, Filipe Pereira Lemos, konsidera postu saúde Lawakou – Fohorem ne’ebé abandona durante tinan 8 ona tanba konstrusaun refere ilegál no la-tuir kritéria atu uza sai nu’udar fatin ba atendementu saúde nian.
“Uma ida hari’i iha Lawakou ne’e tanba la tama kritéria atu hari’i postu saúde ne’e maka governu liu-hosi Ministériu Saúde hari’i fali postu saúde iha sentru suku mak agora dadaun hanaran postu saude Dato Tolu”, dehan, Filipe Pereira, ba SMI iha ninia serbisu fatin, Tersa, (11/08) hodi responde ba preokupasaun Xefe Suku Dato Tolu, Agostinho Resi, ne’ebé preokupa ho postu saúde Lawakou tanba abandona ona durante tinan 8 nia laran.
Maske konsidera konstrusaun postu saúde Lawakou-Fohorem ne’e ilegál no la-tuir kritéria maibe sei kontinua konsidera hodi uza ba atividade SISKA nian.
“Uma ida iha Lawakou, tanba iha ona konstrusaun, tan ne’e konsidera hanesan fatin ba klínika ida wainhira aban bainrua ita iha ona rekursu ne’ebé naton, maibe agora dadaun sei funsiona uma ne’e sai hanesan fati SISKA no mobile klinika iha fatin refere”, esplika, Diretúr Saúde Munisípiu Covalima ne’e.
Hatan ba preokupasaun komunidade kona-ba pesoál parteira no enfermeiru ne’ebé menus hodi halo atendementu ba inan isin-rua sira, Diretúr, Filipe, klarifika, kestaun menus rekursu umanu sai obstaklu boot ba atendementu saúde komunidade no inan isin-rua iha suku Dato Tolu, Postu Administrativu Fohorem.
Maibe, nia hatutan, iha ona planu hosi serbisu saúde munisípu Covalima nian atu aumenta tan rekursu iha postu saúde Fohorem inklui postu saúde Dato Tolu nian.
“Ita sei menus ba rekursu mak agora dadaun iha postu administrativu Fohorem, suku Dato Tolu iha de’it Enfermeiru ida ne’ebé durante ne’e halo kontrollu. Maibe tuir planu serbisu saúde sei aumenta tan parteira hodi halo atendementu ba inan isin-rua sira iha suku ne’ebé lokaliza iha suku Dato Tolu maibe depende ba rekrutamentu ne’ebé ministerio halo”, katak nia.
Antes ne’e, Xefe Suku Dato Tolu, Agostinho Resi, esplika, postu saúde ne’ebé Governu liu-hosi Ministériu Saúde – MS establese iha Lawakou, Suku Dato Tolu, Postu Administrativu Fohorem, Munisípiu Covalima kuaze tinan 8 ona abandonadu no laiha atividade atendementu saúde ba komunidade liu-liu inan isi-rua sira ne’ebé difikulta tebes inan-feton sira wainhira atu partu.
Xefe Suku Dato Tolu, Agostinho Resi, esplika, relasiona ho pesoál saúde ne’ebé parte MS destaka iha postu saúde Lawakou – Fohorema abandona ona sentru refere halo komunidade sira tenke la’o kilometru 15 hodi halo tratamentu saúde.
“Durante ne’e ha’u nia komunidade sira iha ne’e atu halo tratamentu saúde, liu-liu ba inan isin-rua sira ne’ebé atu partus tenke la’o dook to’o postu saúde Fohorem ho distansia dook, kuaze kilomentru 15”, dehan Agostinho Resi, ba SMI iha ninia rezidénsia, Suku Dato Tolu, Segunda, (10/08).
Relasaun ho distansia postu saúde Fohorem ne’ebé dook hosi suku Dato Tolu fó impaktu boot ba atedementu lalais ba komunidade (inan isin-rua) wainhira atu partu.
Líder komunitariu ne’e esklarese, durante ne’e dala-barak komunidade hulan de’it inan isin-rua sira ne’ebé atu partu hosi suku Dato Tolu to’o postu saúde Fohorem tanba postu saúde Lawakou abandonadu nomós estrada at iha tempu udan.
“Dala-barak komunidade sempre hulan inan isin-rua sira ne’ebé atu partus, lori hosi suku Dato Tolu ba postu saúde Fohorem maibe talvez molok to’o postu saúde Fohorem bebe moris ona no la konsege salva vida, no wainhira to’o postu saúde parteira no infermeiru sira salva de’it bebe nia inan”, dehan Agostinho.
Autoridade lokál ne’e, informa tan, problema boot seluk ne’ebé ninia komunidade infrenta la’os de’it kestaun distansia dook, maibe fatór fasilidade saúde hanesan laiha ambulansia atu transfere lalais pasiente sira halo bebe barak mak mate iha dalan antes to’o iha postu saúde Fohorem.
“Bainhira tempu udan komunidade hulan de’it pasiente sira tanba iha ne’e laiha ambulansia atu tula pasiente sira ba postu saúde Fohorem. Tan-ne’e, dala-ruma to’o iha (postu saúde Fohorem) parteira no infermeiru sira salva de’it bebe nia inan, bebe ne’ebé foin moris tenke fila (mate), ida-ne’e tinan-tinan sempre akontese”, katak Xefe suku ne’e.
Liga ho situasaun postu saúde Lawakou-Fohorem ne’ebé abandonadu no distansia dook hodi asesu sentru saúde, Agostinho Resi, husu ba Governu atu tau konsiderasaun hodi koloka fila fali parteira no infermeiru iha postu saúde Lawakou nian.
Antes remata entrevista, líder komunitariu ne’e konsidera Governu laiha planu ne’ebé di’ak wainhira atu establese postu saúde ida hodi gasta orsan povu de’it maibe ikus mai laiha benefisiu ba komunidade tanba abandonadu.
Nia, hatutan, antes ne’e, ninia parte halo konfirmasaun ba Hospital Referal Covalima kona-ba destakamentu pesoál saúde, maibe hetan responde katak pesoál parteira no enfermeiru sira lakohi ba postu saúde Lawakou tanba fatin izoladu.(Editór, Francisca Soares).
