Dili-SMI, Reuniaun Konsellu Superior Defeza no Seguransa (CSDS-sigla Portugues), Kinta-feira, (05/07), iha Palasiu Prezidente Repúblika deside ona atu halo ezenorasaun ba Vise –Xefe Estadu Maior Jenerál Forsa Armada, Brigadeiru Jenerál, Filomeno Paixão.
“Iha reuniaun CSDS ne’ebé hala’o oras ida resin ne’e, deside ho unanimidade simu proposta governu nian ba ezonerasaun Vise-CEMGFA, Birgadeiru General Filomeno Paixão”, tuir komunikadu Imprensa husi Gabinete Primeiru Minstru ne’ebé SMI asesu, Kinta, (05/07).
Razaun fundamentu CSDS hodi deside halo ezenorasaun ba Brigadeiru Jenerál Filomeno Paixão tanba atu asumi kargu Ministru Defeza iha VIII Governu Konstitusionál.
Tuir iha Reuniaun CSDS ne’e mak Prezidente Repúblika Dr. Francisco Guterres “Lú Olo” (preside meza), Primeiru Ministru Taur Matan Ruak, Ministru Negósiu Estranjeirus no Kooperasaun Deonisio Babo, Ministru Justisa Manuel Carceres, CEMGFA Major General Lere Anan Timur, Komandante Jerál PNTL Komisáriu Júlio Hornai no membrus CSDS seluk husi Parlamentu Nasionál no Prezidente Repúblika nian.
Iha parte seluk, Komandante Jerál F-FDTL, Maijor Jenerál, Lere Anan Timor ne’ebé halo enkontru ho PR iha kinta-feira, (04/07) hato’o mós atu fó toma pose lalais Ministru Defeza antes Xefe-de-Estadu aranka Portugál iha tempu badak nia laran.
“Hau mai hasoru Prezidente hato’o ami nia preokupasaun ba ami nia ministru defeza, sira seluk la toma pose ba, tenke fó toma pose ami nia ministru defeza para ami bele halo ami nia serbisu. Tanba prezidente sei ba Portugal”, dehan Lere Anan Timur.
Brigadeiro Jenerál Filomeno Paixão rasik antes ne’e deklara ba mídia nasionál katak prontu atu asumi kargu nu’udar ministru defeza iha VIII Governu konstitusionál nian.
Maske nune’e, Paixão labele hetan toma pose hamutuk ho membru Governu seluk iha loron 22 fulan Juñu foin lalais ne'e tanba seidauk hetan ezenorasaun husi Xefe-de-Estadu nu’udar Komandante Supremu Forsa Armanda nian. (Editor, Lariwa).
