Díli-SMI: Polísia Nasional Timor-Leste – PNTL liu-hosi Unidade Polísia Marítima – UPM evakua hela sidadaun mane ida ninia mate-isin iha tasi-ibun área Tibar, Munisípiu Likisa.
Tuir kronolojia ne’ebé relata hosi Komandu PNTL liu-hosi komunikadu katak UPM simu informasaun hosi parte komunidade sira mak hetan mate-isin ne’e iha tasi-ibun área Tibar nian.
“Loron 07 fulan Agostu tinan 2023, UPM, simu informasaun husi Departementu Operasaun, relasiona ho mate isin nebe Komunidade sira heta iha Area Tibar nian”, haktuir komunikadu ofisiál hosi Komandu PNTL, Segunda, (07/08) ne’ebé SMI asesu.
Bazeia ba informasaun hosi komunidade refere, Komandu PNTL orienta parte UPM hodi halo evakuasaun ba mate-isin sidadaun mane ida refere.
“Depois UPM simu informasaun, direitamente Equipa husi UPM nebe lidera husi Xefe operasaun UPM, ba kedas iha fatin akontesemento hodi asegura Vitima”, relata hosi Komunikadu Imprensa.
Parte instituisaun PNTL sei kontinua prosesu investigasaun hodi buka tuir kona-ba motivu hosi sidadaun mane ne’e nia mate ne’ebé lidera hosi parte komandu munisípiu Likisa rasik.
“Sei kontinua prosesa tuir regras Investigasaun, ne’ebé sei hala’o husi Komandu Munisípiu Likisa”, haktuir hosi komunikadu.
To’o notisia ne’e públika parte SMI seidauk konsege konfirma parte kompetente hodi hetan infromasaun detallu sobre asuntu refere. (Editór, Rui Santos).
