Liquiça-SMI: Eis Komandante Jeral Polisia Nasional Timor-Leste – PNTL, Longuinhos Monteiro, indetifikadu hosi autoridade seguransa subar kilat boot no kiik inklui munisões lubuk ida iha ninia rezidénsia, iha área Loes, Postu Administrativu Maubara, Munisípiu Liquiça.
Liu-hosi autoridade seguransa ne’ebé kompostu hosi PNTL, Servisu Nasionál Intelijensia – SNI no Falintil Forsa Defeza Timor-Leste – F-FDTL konsege rekoilla kilat boot tolu, pistola ida, rama automatika ho munisões bá kilat J3, M16 no pistola glock19.
“Iha Buska ne’e konsege rekolla kilat boot tolu, pistola ida, rama automatika ho munisões bá kilat J3, M16 no pistola glock19”, SMI sita publikasaun Hatutan.com, Segunda, (16/01).
Autór ne’ebé deskonfia subar kilat, Longuinhos Monteiro, ba Lusa katak nia rasik laiha koñesimentu bainhira autoridade seguransa ba halo buska iha ninia rezidénsia no laiha karta autorizasaun ka karta buska ruma.
Maibe, Longuinhos rasik entrega an diretamente ba parte seguransa hanesan Polícia Cientifica Investigação Criminál (PCIC) relasiona ho kazu subar kilat iha ninia rezidénsia.
Kilat hirak ne’ebé parte ekipa konjunta rekoilla asegura ona iha parte kompetente hodi kontinua submete ba prosesu investigasaun tuir mai.
Antes ne’e, Longuinhos Monteiro, okupa kargu importante sira mak hanesan eis Ministru Interior, Preokurador Jerál da Repúblika, inklui pesoal save partidu balun iha nasaun ida-ne'e. (Editór, Caleri).
