Dili-SMI, Sekretáriu Estadu Juventude no Traballu - SEJT, Nivio Mangalhães deklara katak ninia funsionáriu balun durante ne’e uza sala patrimoniu estadu hanesan motor tanba fo fali ba ninia familia hodi uza atividade privadu nian.
“Ha'u simu informasaun katak funsionariu balun simu tiha motor sira la utuliza maibé fó fali ba sira-nia familia mak uza. Ida nee labele. Motor ne’ebé sira simu atu fasilita sira-nia servisu, tanba ne’e sira tenke utuliza ba sira-nia servisu la’os atu rai fali iha uma”, dehan nia hafoin halo inspesaun ba patrimoniu estadu iha Edifisiu SEJT, Kaikoli, Segunda, (05/02), liu husi komunikadu imprensa ne’ebé SMI asesu.
Nivio esplika, durante inspesaun Sekretáriu Estadu ne’e identifika funsionáriu balun tenta bosok katak seidauk bele lori motor ba edifisiu tanba rai hela iha munisipiu, balun dehan sei iha hela ofisina. Pior liu tan, rezultadu inspesaun ne’e hatudu katak funsionáriu balun hasai ona xapa matrikula estadu nian husi motor ne’ebé sira uza.
Maske iha razaun oi-oin husi funsionáriu sira maibe nia husu atu aprezenta relatóriu eskrita nomós patrimoniu estadu ne’ebé funsionariu sira simu hanesan motor no kareta ne’ebé durante ne’e sira uza maibe dadaun ne’e laiha justifikasaun klaru kona-ba paradeiru motor no kareta hirak ne’e.
"Ohin funsionariu balun hatete dehan seidauk bele lori mai tanba sei iha hela munisipiu no balun hatete dehan sei aat hela, "Ohin (horsehik) ha'u husu ba sira atu hatudu motor ne'e para iha ne'ebé. Motor balun nia xapa matrikula ne'e sira hasai tiha”, dehan Nivio.
Haree husi atetude no hahalok fusionáriu sira ne’ebé laiha responsabilidade moral ba patrimoniu estadu nian, Sekretariu Estadu ne’e fo ona ultimatum ba funsionáriu sira ne’ebé identifikadu uza sala patriomoniu atu fó fila sasan hirak ne’e iha loron sesta semana ne’e.
"Ha'u fó tempu ba sira to'o Sesta-feira hothotu tenke hatama (patrimoniu estadu). Nia atu aat mós lori mai par ita haree nia at ne'e iha ne'ebé nune’e bele hadia, halo manutensaun, tanba ekipamentu sira ne'e hanesan ha'u dehan ona ne'e povu nian, sé de'it mak utuliza tenke utuliza ho loloos," tenik nia. (Editor, Lariwa).
