Laútem-SMI: Joven na’in 2 ho naran Anselmo da Costa Caetano (20) no Ambrosio da Costa Ribeiro (17) ne’ebé identifikadu nu’udar maun-alin hosi aldeia Soleresi, Suku Maina I, Postu Administrativu Laútem, Munisípiu Laútem, mate hamutuk iha tanki pertamina laran hafoin sira hamoos foer iha tanki laran.
“Ohin dader provolta de 7 oras akontese insidente iha mini pertamina ida, iha suku parlamentu, Postu Administrativu Laútem. Insidente ne’e hamosu rezulta vítima na’in rua tenke lakon sira nia vida, vítima ida mak Anselmo da Costa Caetano no Ambrosio da Costa Amaral, sira maun-alin, hosi suku Maina I, aldeia Soleresi”, dehan, Komadante PNTL Munisípiu Laútem, António Rego Fernandes, ba SMI liu-hosi via-telefone, Segunda, (21/09).
Tuir kronólojia akontesementu, iha parte dadersan joven maun-alin ne’e, ida maun tinan 20 tama uluk iha tanki atu hamoos foer tanba atu prepara ba ense mina ne’ebé tuir planu distributor hosi Díli atu lori ba Laútem.
Maibe, depois vítima Anselmo da Costa Caetano tama iha tanki laran no la sai ona entaun vítima ida seluk ho naran Ambrosio da Costa Ribeiro mós tama tuir ne’ebé ikus mai sira na’in rua tenke mate hotu iha tanki laran tanba dada-iss labele.
“Iha altura, iha dadersan, vitima na’in 2 ne’e ida primeiru tama iha tanki laran hodi hamoos foer hodi prepara tanki ne’e hodi ense mina hosi Díli tula mai ne’ebe iha altura ne’eba vitima primeiru ADC ne’e tama ba laran depois nia dada iis labele taun nia labele sai ona mai, taun ninia kolega ida fali mós la-auguenta taun sira na’in rua tenke lakon sira nia vida iha depozitu laran”, haktuir, komadante PNTL munisípiu Laútem.
Relasaun ho akontesementu ne’e, parte PNTL serbisu hamutuk ho sentru saúde Laútem hodi halo ona ezaminasaun ho rezultadu katak kauza hosi vítima maun-alina na’in rua ne’ebé mate iha tanki pertamina laran tanba labele dada-iss.
“Ami serbisu hamutuk ho parte infermeiru (saúde Laútem), ezamina de’it parte liur depois ami halo konkluzaun ida katak kauza ne’ebe halo sira rua mate ne’e tanba deskonfia laiha sirkular ar no anin iha tanki laran, sira labele dada-iss depois sira mate”, katak, António Fernandes.
Nia, hatutan, parte PNTL labele halo prosesu autopsia tanba família matebian na’in rua la-aseita, maibe parte polísia kontinua mantein serbisu hamutuk ho parte Ministériu Públiku – MP kona-ba prosesu legál liga ho akontesementu refere.
“Provizoriamente familia lakohi halo autopsia ba mate isin ne’e. Sira lakohi halo autopsia, tanba ne’e, ami kontinua mantein serbisu hamutuk ho Ministériu Públiku para aserta kona-ba situasaun sira ne’e”, tenik nia.
Mate isin dadaun ne’e sei iha parte sentru saúde Laútem nian no hein entrega ba família hodi halo prosesu funebre tuir tradisaun ka kultura família nian. (Editór, Francisca Soares).
