20
Mon, May
0 New Articles

Laiha Ambulansia, Família Tula Mate Isin Ho Kareta Anguna

Família hulan matebian Uvalda da Costa nia isi-mate atu hatama kareta Anguna iha HNGV, Kuarta, (13/07). Foto, Laura Fernandes.

Breaking News

Díli-SMI: Problema menus fasilidade hanesan kareta Ambulansia ka funerariu iha Hospital Nasional Guido Valadares – HNGV Díli hodi apoiu urjente tula sidadaun ne’ebé mate iha tempu kalan, halo família matebian sira tenke deside tula mate isin ho kareta Anguna (Carry) hodi lori ba uma.

Kazu ne’e akontese ohin, Kuarta, (13/07) iha HNGV maizumenus tuku 6 dadersan familia Zito Fernandes, tula mate-isin ninia kaben Uvalda da Costa ho kareta Anguna tanba hahú tuku 3 madruga hein ambulansia maibe laiha.

“Ami hare’e, Telfone kondutor Abulansia sira ne’ebétaka iha odamatan mortuariu, ami kontaktu hotu kedas no laiha númeru kontaktu ida ne’ebé ativu hodi ami bele ko’alia ho (ami).

“Tanba ne'e , tama ona ba tuku 6 dader ami família deside tula ba kareta Carry ne’ebe família matebian nia laen nia maun nia kareta”, esplika, Predro.

Matebian Uvalda da Costa, mate iha HNGV wainhira ninia família lori ba ospital maizumenus tuku 3 madrugada tanba moras maibe labele salva nia vida.

Ikus mai, tanba hein ambulansia besik oras tolu ona nomós razaun presiza lori mate-isin ba uma atu hamoos ka fó haris antes tau kaisaun, nune’e família deside tula ho kareta privadu hosi HNGV ba matebian nia uma iha aldeia Auhun, Suku Becora, Postu Administrativu Cristo Rei, Munisípiu Díli.

“Bainhira ami hodi to’o Hospital Nasional Guido Valadares, Sala de Emerjénsia mais ou menus dader tuku 03: Otl, Bainhira (to’o) ami kous hatoba kama dudu tama sala emerjénsia liu-deit, 10 minutu hanesan doutor sira dehan ona mai ami família mana ami labele salva no is kotu ona.

“Nune’e iha sala de emerjénsia, ami ho familia sira dudu kedas ba sala mortuariu. No iha ne’e ba liu oras 1 hnesan ne’e, ami hare’e oras la’o dadaun, rai komesa naroman ona, ita presiza hodi sedu tiha ba uma para prepara no fó haris tia (nia mate isin), tamba horiohin ona tia is-kotu.”, dehan, Pedro Peduau, nu’udar subriñu hosi matebian.

Matebian Uvaldu da Costa, moris iha Venilae, Baucau no kaben ho Zito Fernandes hosi Uatulari, Viqueque. Matebian mate husik nia laen no oan na’in 7 ne’ebé kompostu hosi feto ema na’in 5 no mane hamutuk ema na’in 2.

Tuir obervasaun SMI, kazu tula mate-isin ho kareta privadu iha HNGV la’os foin akontese maibe dala-barak ona, inklui mós akontese iha munisípiu sira iha teritoriu laran.

To’o notisia ne’e publika parte redasaun SMI seidauk konfirma ba resposavél masimu HNGV nian kona-ba asuntu refere. (Editór, Rui Santos).

Pin It

Follow us on Twitter

Sign up via our free email subscription service to receive notifications when new information is available.