Manufahi-SMI: Hodi kontribui paz ba sosiadade, Grupu Arte Marsial – GAM 9 iha munisípiu Manufahi halo komprimisiu ba públiku hodi reafirma sira nia pozisaun hodi kontribui paz no hakmatek iha sosiadade nia-leet.
GAM hirak ne’e mak kompostu hosi PSHT, Santo Antonio, IKS – Kera Sakti, KORK, Serulin Dewata, Perisai Diri, Taek Wondo, Sete – Sete, no Sagrada Korasaun de Jesus.
Liu-hosi komprimisiu ne’e hamosu pontu importante lima mak hanesan organizasaun Grupu Arte Marsial - GAM no Grupu Arte Ritual - GAR sei kolabora ho instituisaun Polísia Nasional Timor-Leste – PNTL hodi kria paz iha Manufahi.
GAM no GAR sei bandu ka la-fó autorizasaun ba ninia membru sira atu uza atributu organizasaun nian iha fatin públiku ne’ebé laiha relasaun ho atividade organizasaun nian.
GAM no GAM mós promete sei kontribui ba ambiente saudavel iha munisípiu Manufahi nomós bandu ninia membru sira uza naran organizasaun hodi halo afiliasaun ba partidu polítku sira.
No, ikus liu mak pesoal ka membru GAM ka GAR ne’ebé komete krime hodi entraga naran organizasaun nian sei hatan ba justisa tuir lei haruka.
Iha oportunidade ne’e, Reprezentante Prezidente Komisaun Reguladora Arte Marsial - KRAM Munisípiu Manufahi, Alcino da Costa Isack, deklara, dezde 2019 Governu bandu GAM atu halo halo atividade treinamentu maibe dadaun ne’e Governu autoriza ona.
“Durante tempu naruk ida Estadu hasai karta ida atu la-reativa Arte Marsiais sira. Prosesu sira ne’e hotu tuir rezolusaun governu Nú 3 fulan Marsu, fó sai iha 2019 atu reativa fila-fali Arte Marsiais sira, liu-liu ba Arte Marsiais tolu ne’ebé mak desididu Taka, entaun reativa fila fali.
“Iha prosesu konsilidasaun KRAM hamutuk ho ita-boot sira konsilida durante tinan tolu nia laran hahúhusi tinan 2019 to ohin loron tinan 2022, ita reativa no rekezitu sira ne’ebé KRAM estabelece mak iha rekezitu 19 hodi reintegra fila-fali Arte Marsiais ba sosiedade hodi kontribui ba paz no estabilidade”, dehan, Alcino da Costa, ba Radiu Komunidade Manufahi, foin lalais ne’e.
Parte seluk, Reprezentante Administrador Munisípiu Manufahi, Manuel Henrique, fó atensaun ba GAM no GAR sira atu kumpri promesa ka komprimisiu ne’ebé sira halo ba públiku hodi kontribui paz no estabilidade iha Manufahi.
“Maske reativa fila fali atividade, keta haluha kontribui ba paz no estabilidade iha rai ida ne’e. Agradese ba Arte Marsiais no Arte Rituais iha Manufahi (ne’ebé) durante ne’e seidauk iha konflitu”, katak, Manuel.
Autoridade munisípal ne’e husu ba joven sira liu-liu membru GAM no GAR sira tau hatudu hahalok di’ak no sai modelu ba joven hosi munisípiu seluk.
Komandante PNTL Munisípiu Manufahi, Superintendente Polísia, Joni Viana da Regras, hato’o parabens ba GAM no GAR ne’ebé halo komprimisu hakribi violensia inklui hakarak kopera ho autoridade seguransa hodi kria ambiente hakmatek ba povu iha munisípiu Manufahi. (Editor, Caleri).
