Maubisse – SMI: Kompañia Devita Unipessoal Lda ho kompañia SE Mahuhein Unipessoal Lda ne’ebé asina kontratu iha tinan 2014 hodi halo instalasaun eletrisidade iha Suku Mauchiga, Postu Administrativu Maubisse, Munisípiu Ainaro, sai abandonadu durante tinan 8 ona tanba to'o ohin loron seidauk finaliza projetu refere, halo komunidade kontinua moris iha nakukun laran.
“(Projetu) eletrisidade ne’ebé maka implementa ka ezekuta hosi kompañia SE MAUHEIN ne’ebé maka ho nia parseiru Divita Unipessoal hetan kontratu hosi 2014 ate a data (projetu seidauk finaliza).
Signifika iha Quartu Governu no Setímu Governu no oitavu Governu ba dala rua nian, governu nee troka malu dala tolu ou haat, maibe (komunidade kontinua iha nakukun nia-laran)”, dehan Suku Mauchiga, Guilherme Rodriques Soares, ba Rádiu Mauloko Maubisse, foin lalais ne’e.
Guilherme, hatutan, dala-barak ona komunidade protesta hodi husu resposabilidade ba kompañia Devita Unipessoal Lda ho SE Mauhein Unipessoal Lda atu responsabiliza sira nia serbisu hodi finaliza lalais projetu eletrisidade atu bele fó naroman ba povu iha área refere.
Nune’e mós husu Governu sentral atu tau konsiderasaun ba asuntu refere tanba durante tinan 8 ona kompañia abandona sira nia resposabilidade ne’ebé fó impaktu ba projetu instalasaun eletrisidade paradu to’o ohin loron.
“Ami nia ezijensia barak, konferensia pers la’os mak ohin mais lubuk ida ona halo iha Dili iha Mauchiga rasik. Maibe ita nia governu nunka rona no tau atensaun ba povu nia halerik iha nakukun laran”, tenik lider lokál ne’e.
Liga ho asuntu ne’e, Porta-Voz komunidade Mauchiga, Matias da Silva, husu lider VIII Governu, Taur Matan Ruak, atu tau atensaun ba ejizénsia komunidade suku Mauchiga atu bele aslera fila fali instalasaun enérjia eletrisidade hodi bele fó naroman ba komunidade sira.
“Súa Exelénsia Primeiru Ministru, Taur Matan Ruak, atu bele tau iha konsiderasaun ba substituisaun refere hodi bele fianliza obra eletrisidade iha tinan ne’e nia laran (2022).
“No husu ba Ministeriu Obras Publiko atu fó legalidade ba substituisaun konpañia seluk hodi bele finaliza obra eletrisidade iha Suku Mauchiga bazeia ba ezijensia komunidade Suku Mauchiga nian”, katak, Matias.
Projetu instalasaun eletrisidade iha suku Mauchiga ho Nunumogue ne’e rasik kompañia SE Mauhein Unipessoal Lda ne’ebé parseira ho Devita Unipessoal Lda halo asina kontratu iha 2014 hodi implementa projetu refere. (Editór, Caleri).
