Díli-SMI: Fundasaun Mahein – FM nu’udar sosiadade sivil ne’ebé halo monitorizasaun no advokásia ba seitor defeza no seguransa iha rai-laran kestiona ba desizaun VIII Governu ne’ebé fasilita seguransa pesoal hosi instituisaun polisial parte Unidade Espesial Polisia – UEP ba lider artemarsial Kmanek Oan Rai Klaran - KORK durante periodu kampaña prezidensial nian.
“Konsileiru Masimu” partidu KHUNTO, José dos Santos “Naimori”, ne’ebé nu’udar Mestre boot Arte Marsiais KORK nian tun direita iha fatin akontesementu lori ho eskoltu ida, uza sivil ho kilat boot. Hafoin insidente PNTL konfirma katak eskoltu Naimori nian ne’e membru PNTL husi Unidade Espesial Polisia (UEP), ne’ebé kolokadu fo seguransa ba nia iha nia rezidensia,tanba nia husu pedidu husi Governu hafoin hetan ameasa”, FM alerta liu-hosi komunikadu Imprensa, foin lalais ne’e.
Relasiona ho asuntu refere, FM konsidera nu’udar aktu politizasaun ka privatizasaun instituisaun seguransa nian liu-liu instituisaun Polísia Nasional Timor-Leste – PNTL.
Tanba FM ninia monitorizasaun identifika katak durante ne’e mosu duni prátika Khuntonizasaun iha PNTL no politizasaun ba seitór seguransa nian.
“Kestaun seluk ne’ebé hatudu oinsá impunidade ameasa seguransa nasionál mak politizasaun no privatizasaun ba seguransa estadu. FM alerta tiha ona iha artigu dahuluk sira kona-bá “Khuntonizasaun” ba PNTL, no politizasaun ba setor seguransa”.
“Ema barak deskonfia membru PNTL halo juramentu ho Partidu Kmanek Haburas Unidade Nasional Timor Oan (KHUNTO), no sira mos membru grupu arte marsiais ka rituais”, tenik FM iha komunikadu.
Tuir FM katak Lei Organiku PNTL Nú, 09/2009, artigu 29 mensiona kona-ba instituisaun PNTL liu-hosi UEP bele fornese seguransa ba pesoal importante sira maibe konselleiru KHUNTO, Jose dos Santos “Naimori” la’os asumi kargu ka kaer pozisaun ofisial iha Estadu nian.
“Tuir artigu 29, Dekretu Lei Nu.09/2009, loron 18 Fevereiru, Lei Organika PNTL, membru UEP-PNTL bele fornese seguransa personal ba “entidade alta” nasional no estranjeiru ne’ebe vizita Timor-Leste. Maibé, lei la define klaru se ida ne’e so inklui ema ho pozisaun estadu ofisiál, ka bele mos inklui ema ne’ebé la kaer pozisaun estadu ofisiál.
“Naimori rasik la kaer pozisaun ofisiál, nia hanesan “Konsileiru Masimu” ba KHUNTO, partidu ida ne’ebé sai (harii) Governu. Presiza klarifikasaun kona-ba legalidade Governu nia aprovasaun atu fó seguransa pesoal ba Naimori husi PNTL”, katak FM.
Nune’e, FM husu ba VIII Governu ne’ebé lidera hosi Primeiru Ministru, Taur Matan Ruak, atu haree fila fali desizaun sira kona-ba apoiu seguransa ba lider artemarsial KORK refere.
“Ami husu ba Governu atu avalia fila fali desizaun atu fo protesaun pesoal ba Naimori inklui klarifika justifikasaun legál, no mos tau atensaun seriu ba kestaun politizasaun instituisaun seguransa”, dehan FM.
Maske nune’e, FM apresia ba dezisaun Komandu PNTL nian hodi loke prosesu displinar ba membru UEP ne’ebé akompaña Naimori ho kilat maibe la-uza farda polisial durante la’o vizita fatin akontesementu iha Ainaro foin lalais ne’e. (Editór, Guido Santos).
