Díli-SMI: Akademiku no Peskizador Sosiál, Ivo Mateus Goncalves, kritika kualidade projetu iha Governasaun anterior sira hanesan auto-estrada iha Suai no estrada foun Manleuana ne’ebé dadaun ne’e namtate hotu tanba udan-boot loron hirak nia laran ne’e.
“Grande projetu sira, hanesan auto-estrada iha Suai, dalan foun ba Manleuana ne'ebé agora namtate dadaun. Los, ita bele dehan buat natureza ne'e ita labele kontra. Maibe ita mós tenke honestu katak iha projetu barak maka guvernu anterior lansa nu’udar meius halo kampaña. (La) halo estudu klean (feasibility study ou preliminary study) molok hahú projetu”, dehan, Ivo Mateus Goncalves, Tersa, (22/02) iha Díli.
Implementasaun projetu ne’ebé ho ansi no lalais maibe laiha estudu ida ne’ebé klean ba aspeitu rai, kualidade material konstrusaun inklui menus supervizaun susar atu garante kualidade projetu ba tempu naruk.
Ivo Mateus, esplika tan, projetu estrada sira laiha kualidade tanba instituisaun sira ne’ebé toma-konta hanesan Ajensia Dezenvolvimentu Nasional – AND no Ministériu Obras Públicas – MOP iha konspirasaun ho kompañia sira hodi hetan pursentu, ikus-mai la-halo supervizaun ho rigor.
Nune’e, eis peskizador asuntu defeza no seguransa ne’e husu ba kompañia timoroan no estranjeiru sira atu labele hanoin de’it atu hetan lukru boot hosi projetu maibe presiza tau atensaun mós ba kualidade projetu ne’e rasik.
Governu presiza halo kontrolu no supervizaun ne’ebé rigrozu to’o projetu final inklui mós fó sansaun ba kompañia sira ne’ebé laiha displina iha implementasaun projetu sira tuir tempu no la-hatudu kualidade di’ak.
“(Governu) tenke halo kontrola kualidade ho rigorozo to’o projetu remata no tékniku sira mós tenke iha kualidade.
“La-halo estudu ida kle'an sobre tipu rai, kualidade material ba konstrusaun, laiha supervizaun, laiha sansaun ba kompañ sira ne'ebé la disipliplina”, katak Ivo Mateus.
Maske nune’e, nia husu ba Governu atual atu labele fó sala ba governasaun anterior maibe oinsa bele foti ona medida ruma hodi responde ba estrada sira ne’ebé hetan estraga ona durante ne’e.
“Mesmo que nune'e, Governu atual la presiza fó kulpa ba governu ida uluk. Tenke foti ona medidas adekuadu, hanoin ona sobre manutensaun para la bele kauza tan estragus ne'ebé at liu”, tenik nia.
Dadaun ne’e, Governu liu-hosi Institutu Jestaun Ekipamentu – IJE halo hela normalizasaun fila fali estrada dirasaun Díli – Aileu ne’ebé hetan estraga tanba udan boot foin lalais ne’e. (Editór, Rui Santos).
