Metinaro – SMI: Xefe Estadu Maior Jeneral Falintil Forsa Defeza Timor-Leste – F-FDTL, Tenente Jenerál, Falur Rate Laek, iha loron segunda, (21/2) hala’o ninia primeiru vizita ba Komponente Apoiu Servisu- KAS iha metinaro hodi haree direta situasaun infra-estrutura, lojistika no seluk tan.
Iha ámbitu vizita ne’e, lider instituisaun F-FDTL foun ne’e rona diretamente preokupasaun hosi membru KAS nian liu-liu kona-ba asuntu fasilidade atu apoiu serbisu komponente nian.
Liga ho preokupasaun hosi membru KAS nian, Jeneral fitun tolu ne’e esplika, iha ninia vizita ne’e atu rona diretamente hosi membru F-FDTL hodi nune’e bele buka dalan hodi rezolve problema sira ne’ebé durante ne’e parte KAS infrenta.
“Ohin hau mai para rona de’it imi nia preokupasaun durante ne’e imi infrenta, la’os mai fó solusaun ba imi nia problema, para depois ita hamutuk bele hadia, ha’u mesak labele persiza ita hamutuk hodi lori instituisaun ne’e ba oin”, dehan, Falur Rate Laek, hafoin resposta preokupasaun membru militar hosi KAS nia.
Intensaun hosi vizita ne’e mós parte ida atu introduz an ba membru F-FDTL iha KAS kona-ba ninia pozisaun atual agora hanesan lider masimu ba instituisaun milítar hafoin simu pose hosi Prezidente Repúblika, Francisco Guterres “Lú Ólo” foin lalais ne’e.
Vizita ofisial Xefe Estadu Maior Jenerál F-FDTL ne’e simu diretamente hosi Komandante Komponente Apoíu Servisu, Tenente Koronel, Armindo Nunes, ho nia estrutura tomak hosi Komponente Apoíu Servisu nian
Durante vizita akompaña hosi Xefe Repartisaun sira hosi kuartel Jenerál, Gabinete Xefé Estadu Maior Jenerál nian, no hetan seguransa maximu hosi Unidade Polisia Militár nomos batedores Polisia Militár. (Editór, Rui Santos).
