Díli-SMI: Polítika Governu atu promove arte iha rai-laran hamosu konfuzaun boot tanba deside hodi duni sai Grupu Arte Moris ne’ebé okupa eis fatin eis muzeu iha Comoro iha tinan 2021 ho razaun oi-oin maibe kria fali programa hodi halo konstrusaun sede 10 ba Grupu Arte Marsial – GAM iha 2022.
Arte Moris rasik funda 1 Fevereiu 2003 hosi foinsaé na’in 12, tinan ida hafoin Timor-Leste restaura ninia independensia, iha 6 Jullu 2020 Governu deside duni sai Grupu Arte Moris hodi foti fali fatin refere no entrega ba Konsellu Kombantente Libertasaun Nasional (CCLN, sigla Português).
Maibe dadaun ne’e Governu liu-hosi Sekretáriu Estadu Joventude no Disportu – SEJD prepara hela orsan hamutuk millaun $2.6 hodi apoiu atividade GAM nian.
“Orsamentu ba konstrusaun sede ba arte marsiál ne’e aprova ona, Governu aloka ona. Iha (sede) sanolu (10) resin, kuandu sira iha rai, ita sei ajuda. Maibe sei halo kritéria para selesiona loloos, priense rekejitu mak ita ajuda”, dehan, SEJD, Abrão Saldanha, iha Palásiu Governu, foin lalais ne’e.
Abrão Nokosiku, esplika, orsamentu ba konstrusaun sede GAM nian ne’e sei kordena hamutuk Komisaun Reguladora Arte Marsial – KRAM ho entidade relevante sira seluk mak gabinete Primeiru Ministru, liu-liu gabinete apoiu sosiadade sivil nian.
Total orsamentu millaun $2.6 ne’ebé Governu aloka ne’e la’os atu harii de’it sede ba GAM sira maibe mós atu ajuda sira nia atividade organizasaun nian.
“Atu ajuda kontrola ninia treinador sira, hatene sira nia membru loloos ne’e oinsa, regulamentu organizasaun ne’ebé tenke impoen ba membru sira”, nia dehan.
Atualmente GAM hamutuk sanolu resin hitu (17) mak rejista ona no hat (4) prepara hela atu kompleta rejistu, nune’e totál GAM hamutuk 21 iha Timor-Leste. (Editór, Rui Santos),
