Díli-SMI: Tuir planu VIII Governu liu-hosi Sekertáriu Estadu Juventude no Disportu – SEJD rasik prepara hela orsan hamutuk millaun $2.6 hodi halo konstrusaun ba sede artemarsial hamutuk 10 iha tinan 2022, maibe parte Federation International Football Association – FIFA rasik preokupa ho kondisaun estadium iha rai-laran ne’ebé kontinua at.
Prezidente Federasaun Futebol Timor-Leste – FFTL, Francisco Jerónimo, konfirma katak FIFA haruka ona ninia delegasaun na’in rua mai TL hodi hasoru malu ho FFTL hodi ko’alia kona-protidaun FIFA atu hadi’a no dezenvolve futebol iha rai-laran.
“FIFA iha seriedade atu hadi’a estadium di’ak ida, nune’e tinan lima mai tan bele hosting futebol internasional nian. Ohin FIFA hetan de’it mak dokumentu sira rai nian, semana oin (sira) haruka kedas sira nia ema mai verifika rai atu hadi’a estadiun”, dehan, Prezidente FIFA, Francisco Jerónimo, hafoin hasoru malu ho delegasaun FIFA, foin-lalais ne’e, iha Díli.
Atu garante komprimisiu hodi hadi’a di’ak liu-tan kondisaun estadiun sira iha rai-laran, parte FFTL rasik sei kordena ho Ministériu Justisa hodi bele aslera prosesu dokumentu sira kona-ba rai atu harii estadiun sira.
Maibe dadaun ne’e Governu liu-hosi Sekretáriu Estadu Joventude no Disportu – SEJD prepara hela orsan hamutuk millaun $2.6 hodi apoiu atividade GAM nian.
“Orsamentu ba konstrusaun sede ba arte marsiál ne’e aprova ona, Governu aloka ona. Iha (sede) sanolu (10) resin, kuandu sira iha rai, ita sei ajuda. Maibe sei halo kritéria para selesiona loloos, priense rekejitu mak ita ajuda”, dehan, SEJD, Abrão “Nokosiku” Saldanha, Palasiu Governu, fulan hirak liu-ba.
Abrão Nokosiku, esplika, orsamentu ba konstrusaun sede GAM nian ne’e sei kordena hamutuk Komisaun Reguladora Arte Marsial – KRAM ho entidade relevante sira seluk mak gabinete Primeiru Ministru, liu-liu gabinete apoiu sosiadade sivil nian.
Total orsamentu millaun $2.6 ne’ebé Governu aloka ne’e la’os atu harii de’it sede ba GAM sira maibe mós atu ajuda sira nia atividade organizasaun nian.
“Atu ajuda kontrola ninia treinador sira, hatene sira nia membru loloos ne’e oinsa, regulamentu organizasaun ne’ebé tenke impoen ba membru sira”, nia dehan.
Atualmente GAM hamutuk sanolu resin hitu (17) mak rejista ona no hat (4) prepara hela atu kompleta rejistu, nune’e totál GAM hamutuk 21 iha Timor-Leste. (Editór, Rui Santos).
