Díli-SMI: Conselho de Imprensa – CI lansa tan ona prémiu jornalizmu foun ba públiku ho naran prémiu Max Stahl ba kategoria dokumentariu di’ak liu ba Diretu Umanu nian hodi fó onra ba ninia kontribuisaun luta ba libertasaun nasional.
CI deside prémiu foun ho naran Max Stahl ne’e liu-hosi plenaria foin lalais ne’e no publika ona iha Jornal da Repúblika liu-hosi deliberasaun númeru 07/2022, loron 6 fulan Maiu, tinan ida-ne’e.
“Desizaun ba Prémiu foun ho naran Max Stahl ne’e Conselho de Imprensa foti liuhusi plenaria ho ida-ne’e ita delibera kedas no publika ona iha Jornál da Républika. Tan-ne’e, ohin Conselho de Imprensa uza biban ida-ne’e ho publikamente hato’o katak ita iha tan prémiu jornalizmu foun ba jornalista Timor-oan sira atu aplika”, dehan, Prezidente CI, Virgílio da Silva Guterres.
Virgílio Guterres, hateten, esforsu CI hodi lansa tan prémiu foun ne’e atu loke espasu ka oportunidade ba maluk jornalista sira no kanál mídia ka asosiasaun jornalista nian hodi promove di’ak liu-tan liberdade imprensa no liberdade espresaun iha rai-laran.
“Anúnsiu prémiu foun ne’e nu’udar oportunidade di’ak ba jornalista, kanál mídia no asosiasaun jornalista sira atu kontinue promove no defende direitu umanu iha país demkorátiku ida-ne’e.
“Liu-liu nafatin promove liberdade imprensa no liberdade espresaun atu sidadaun Timor-Oan hotu-hotu ninia direitu ba informasaun, edukasaun, saúde, bee no saniamentu garantidu iha país foun ne’e”, tenik, Virgílio.
Guterres, klarifika, razaun CI deside tau naran prémiu Max Sthal ne’e tanba matebian Max Stahl nu’udar jornalista kuiñesidu ne’ebé fó ninia kontribuisaun ba ukun rasik-an.
“Prémiu ne’e ita tau naran Max Stalh tamba saudozu Max Stahl nu’udar jornalista naran-boot ne’ebé kontribui ona ba Timor-Leste nia independésia liu-hosi ninia obra jornalístika iha tempu okupasaun militár Indonézia nian,” nia, katak.
Intensaun hosi fó prémiu ne’e mós atu motiva no enkoraja jornalista, kanál mídia no asosiasaun jornalista sira tu kontinua defende direitu sidadaun nian ba moris di’ak, liu-liu publika notisia sira ne’ebé iha ligasaun problema sosiál.
Nia hatutan, hanesan problema infrastrutura, edukasaun, saúde, bee-moos, saniamentu no seluk-tan. Nu’udar halo funsaun kontrolu sosiál jornalista no mídia tenke sai lian ba sira ne’ebé lian-laek.
Razaun fundamentu seluk hodi hamosu premiu foun, Max Stahl ne’e mós bazeia ba Lei Komunikasaun Sosiál, Artigu 44 no Projetu Rezolusaun Parliamentu Nasionál númeru 83/V (4ª) institui Prémiu Max Stahl nu’udar rekoñesimentu ba Saudozu Max Stahl nia luta ba libertasaun nasionál liu-hosi ninia obra jornalístiku sira. (Editor, Rui Soares).
