Díli-SMI: Polisia Nasional Timor-Leste – PNTL liu-hosi Serbisu Migrasaun - SM nian kaptura no sulan ona sidadaun estranjeiru na’in 2 hosi nasaun Xina tanba durante ne’e halo flasifikasaun dokumentu instituisaun estadu nian hodi hetan lukru.
“Atu informa de’it, ita nia membru hosi servisu operasional halo kapturasaun ba sidadaun estranjeiru na’in rua iha area Hudi-Laran, Bairo-Pite, tanba halo falsifikasaun ba dokumentus.
“Parte Migrasaun konklui ona investigasaun maibe tanba sira laiha sala detensaun entaun sidadaun na’in rua ne’e ita detein provizoriu durante oras 72 nia laran, hafoin sei kontinua ba Ministeriu Publiku hodi haree ba parte juridiku nian no halo investigasaun tuir prosesu legál nian”, dehan, Diretúr Jerál Serbisu Migrasaun, Superintendente Asistente Polisia, Luis Soares Barreto, iha Ministériu Interior, Kuarta, (06/07).
Sidadaun estranjeiru na’in 2 ne’e kompostu hosi mane ho naran inisiál WX, idade 33 no feto ho inisiál HJS, idade 33. Ema na’in 2 ne’e parte serbisu operasionál Migrasaun kaptura iha área Hudi-Laran, Bairo-Pite, Díli.
Ema na’in 2 ne’e, durante ne’e loke rasik ajénsia ida no durante ne’e halo falsifikasaun ba dokumentu ofisiál nasaun nian ho sira nia karimbu rasik ne’ebé fó vistu servisu no pareser legál nian.
“Sidadaun na’in rua ne’e rekuiñese sira nia aktu no ita lori mai kedas sede sentral Migrasaun hodi foti identidade no ita entrega ona ba Komandu Munisipiu Díli hodi halo detensaun.
“Evidénsia ne’ebé rekolla maka karimbu 113, kompostu hosi karimbu kompañia 86, karimbu diretores 21, karimbu Ospital Nasional Guido Valadares 1, no restante husi sira nia ajensia. Tenik, Barreto.
Parte Migrasaun mós rekolla mós fasilidade seluk ne’ebé ema na’in 2 ne’e uza hodi produz no flasifika dokumentu ofisiál durante ne’e.
“Ita rekolla mos evidensia hirak ne'ebe iha no dokumentus balu, hanesan pasaporte, no Komputador desktop hamutuk 5, laptop 1 no komandante operasaun ho nia membru sira lori ona evidensia sira ne'e ba Ministeriu Publiku.
“Ami hein deit Prokurador sira atu hare kazu ne'e ou fo kompetensia ba se mak atu hare kazu ne'e no depois lori ba Tribunal no Tribunal sei desidi bazeia ba lei ne'ebe maka iha”, Barreto, relata. (Editór, Rui Santos).
