Díli-SMI: Suspeitu mane ida ho inisial LVN hetan kaptura hosi membru Polisia Nasional Timor-Leste – PNTL, liu-liu Serbisu Informasaun Polisia – SIP tanba involve krime jerál na’ok sasan no baku-rahun kareta iha kapitál Díli.
Joven mane ida inisial LVM ho idade 25 ne’e identifikadu mai hosi munisipiu Ermera ne’ebé dadaun hela iha aldeia 01, Suku Caicoli, Postu Administrativu Vera-Cruz, Munisípiu Díli.
“Polisia Nasional Timor-Leste (PNTL), liu hosi Servisu Informasaun Polisia (SIP), detein suspeitu ho naran inisial LVM, tinan 25 hosi Munisípiu Ermera, hela iha Aldeia 01 Suku Caicoli, Postu Administrativu Vera-Cruz, Munisípiu Díli ne’ebé envolve krime jerál ba kazu baku rahun kareta no foti sasan iha Kapitál Dili”, dehan komunikadu ne’ebé SMI asesu, Kinta, (07/07).
Hafoin hetan kapturasaun no liu-hosi interogasaun suspeitu LVM ho onestu deklara katak nia mak baku-rahun kareta no foti duni laptop iha área Cristo Rei nian inklui na’ok sasan iha fatin seluk hanesan área Sporting kruzamentu BNU, área Portu Díli, Audian no Culuhun.
“Suspeitu LVM, PNTL kaptura iha Bairo dos Grilhos no iha fatin akontesementu suspeitu deklara nia mak baku rahun no foti duni laptop ida iha areadores Cristo Rei.
“Baku rahun kareta Dilicious no foti laptop no telfone ida iha area Sporting kruzamentu BNU tun ba Porto Dili inklui telefone ida, enkuantu iha area Audian no Culuhun baku rahun kareta maibe la konsege foti sasan”, tenik, komunikadu.
Suspeitu LVM parte SIP entrega ona ba parte Serbisu Investigasaun Kriminal – SIK atu halo prosesu investigasaun.
Nune’e, hafoin remata investigasaun entrega diretamente ba Komandu Munisípiu Díli nian hodi halo detensaun durante oras 72, antes lori ba tribunal hodi tuir prosesu julgamentu.
“Hafoin halo kapturasaun, SIP diretamente entrega kedas ba SIK (Servisu Investigasaun Kriminal) Nasional, hodi halo prosesu investigasaun no entrega ona ba Komandu Munisipiu Dili hodi halo detensaun durante 72h, antes submete ba tribunal hodi tuir porsesu julgamentu”, tenik, komunikadu.
Parte SIP sei kontinua buka tuir autor sira seluk ne’ebé hamutuk ho suspeitu LVM liu-hosi serbisu hamutuk ho autoridade judisiáriu sira.
“Operasaun ida-ne’e realiza tanba halo ona koordenasaun ho autoridade judisiária kompetente no oras ne’e daudaun Komandu PNTL hatun ona diretiva ba Komandante SIP hodi intensifika buka tuir autor sira seluk ne’ebe envolve ho kazu hanesan”, katak, komunikadu.
Suspeitu LVM rasik tama ona prizaun iha tinan 2017 no sai iha tinan 2021 tanba komete kazu na’ok iha Audian. (Editor, Rui Santos).
