Díli-SMI: Estadu Japaun liu-hosi Universidade Waseda Japaun kontinua ho komitmentu atu apoiu Governu Timor-Leste liu-hosi establesementu sentru estudu ba foinsa’e sira iha área tekniku kreativu nian.
Komitmentu ne’e reata hosi Resposavél masimu Universidade Waseda Japaun, Professór Mitsuru Yamada, wainhira hala’o enkontru ho Primeiru Ministru, José Alexandre Xanana Gusmão, iha Palásiu Governu foin lalais ne’e.
“Mai hala’o enkontru ho Primeiru-Ministru, Kay Rala Xanana Gusmão, ami ko’alia (asuntu) kona-ba (hari’i) sentru estudu Japaun hodi apoiu ba tekniku kreativu sira iha Timor-Leste”, informa, Professór Mitsuru Yamada.
Durante sorumutu ho Xefe IX Governu, Kay Rala Xanan Gusmão, professor, Mitsuru Yamada, aprezenta ka introdus pontu impotante hosi koperasaun nian ne’ebé diskute ona antes ne’e, wainhira líder masimu IX Governu vizita Japaun iha fulan Dezembru, tinan kotuk liu-ba.
Asuntu importante seluk ne’ebé sai topiku diskusaun durante sorumutu refere mak kona-ba atividade interkámbiu foinsa’e sira hosi nasaun rua nian iha futuru oin mai.
“(Ami) ko’alia mós kona-ba interkámbiu entre Timor-Leste ho Japaun”, esplika, Yamato.
Ko’alia no diskute mós kona-ba asuntu sira ne’ebé atu fó apoiu joven feto no mane sira hosi nasaun rua ne’e hodi kontribui ba paz no estabilidade.
“Ami halo mós diskusaun kona-ba oinsa apoiu foinsa’e sira hodi bele kontribui ba dame. Tanba ita haree ba situasaun iha mundu agora nakonu ho konflitu.
“Ita iha ne’e hodi dudu atu (hamosu) interkámbiu entre kultura, dame no dezenvolvimentu”, katak, lider Universidade Waseda Japaun ne’e.
Durante ne’e Universidade Waseda liu hosi Japan International Corporation Agency (JICA) fasilita ona bolsu estudu ba estudante sira, no agora iha ema na’in-neen husi Timor-Leste mak hala’o hela estudu iha Universidade refere.
Bolseiru sira ne’e mai hosi dosente Universidade Nasionál Timor Loro-sa’e ne’ebé ba hasai sira nia kursu iha área doutoramentu.
Universidade Wasede Japaun rasik estabelese ona sentru estudu ida iha UNTL no haruka dosente hosi Departementu Konunikasaun Sosiál-UNTL ba eskola hodi hasai kursu doutoramentu.
Professor Yamada Yutsuya nu’udar belun di’ak ba povu Timor-Leste no koñese di’ak Xefe Governu Xanana, tanba professor ne’e fó mós kontribuisaun ba prosesu kontrusaun estadu Timor-Leste. (Editór, Rui Santos).
