Díli-SMI: Governu liu-hosi Ministériu Edukasaun – ME kondekora manorin sira hamutuk 86 ne’ebé identifikadu halo ona ninia dezemoenamentu hahú hosi 1975 to’o ohin loron hodi dezenvolve área edukasau iha nasaun ida-ne’e.
“(Ita) kondekora manorin na'in hamutuk 86, liu-liu ba sira ne'ebé desempeña sira nia servisu durante periodu tolu (3), tempu Portugés, Indonésia no ukun rasik-an”, dehan, Ministra Edukasaun, Dulce de Jesus Soares, foin lalais ne’e iha Díli.
Governu deside hodi kondekora ba manorin sira hanesan jestu atu valoriza sira nia serbisu durante tempu naruk hodi kontribui ba sistema edukasaun iha rai-laran.
Nune’e, Governu presiza fó agradesementu ba mestre no mestra sira ne’ebé fó sira nia tempu no matenek hodi forma jerasaun foun sira liu-hosi área edukasaun nian.
“Aktu atu dignifika profesór no profesora sira nee, nuudar faze dahuluk neebé Ministériu Edukasaun hala’o no sei kontinua identifika, verifika no rekolla dadus nafatin ba Manorin nain sira neebé sidauk hetan rekoñesimentu husi Estadu.
"Manorin na’in sira dala ida tan hau agradese, hakruk ho onra ba luta diária, ba motivasaun la sura oras, la sura kolen, la husu rekonpensa atu ezerse sira nia profesionalizmu ho forma neebé di’ak liu.
“Ha’u nia domin ba sira neebé fuk mutin ona, lao labele, balun moras, maibé kontinua kontribui iha área edukasaun hodi tulun Estadu konstrui rai doben Timor-Leste", dehan, Dulce de Jesus Soares.
ME sei iha profesór no profesora antigu barak mak sidauk simu kondekorasaun no sira merese simu, tanba prestasaun servisu extraórdinária iha área remota sira. Nune'e sei kontinua esforsu atu rekolla dadus ba profesór no profesora antigu sira neebé sidauk simu kondekorasaun iha tinan nee.
Ba dahuluk ME fó rekoñesimentu, hodi kondekora ba Manorin na’in hamutuk walu-nulu resin nen (86), ne’ebé kompostu husi profesora/feto lima-nulu resin rua (52) no profesór/mane tolunulu resin hat (34).
Ho kategória Grau Medalla profesór no profesora hamutuk na’in 35, kategória Grau Medalla Insigna profesór no profesora hamutuk na’in 41, no kategória Medalla Méritu profesór no profesora hamutuk na’in 10.
Seremónia kondekorasaun ne’e iha ámbitu Komemorasaun loron Proklamasaun Unilateral ba ukun rasik-an dala 48 iha Palásiu Prezidensial Aitarak-Laran, Díli loron 27 Novembru 2023. (Editór, Rui Santos)
