24
Mon, Jun
0 New Articles

Kalbuadi Lay Nakdedar Hakarak Haruka Traballador Timoroan Ba Brunei

Liurai Brunei Darussalam, Sua Majestade, Hassanal Bolkiah Ibni Omar Ali Saifuddien III ho Vise Primeiru Ministru Asuntu Ekonómiku, Francisco Kalbuadi Lay. Foto, Mídia Vise-PM.

Flash News

Díli – SMI: IX Governu liu-hosi Vise Primeiru Ministru, Francisco Kalbuadi Lay, ho ambisaun boot hakarak haruka tan joventude timoroan ba serbisu iha nasaun estranjeiru hanesan Brunei Darussalam iha tempu badak nia laran.

Ambisaun boot hodi haruka traballador timoroan ba nasaun Brunei Darussalam ne’e konkretiza tiha ona liu-hosi asina akordu bilateral fulan Outubru 2023 iha Brunei, wainhira hala’o vizaun Estadu ba nasaun refere.

Maske nune’e, seidauk iha serteza hosi IX Governu atu haruka traballador timoroan ba Brunei ho kuantidade hira nomós ba serbisu iha kampu traballu área saida.

“Ofisialmente asina tiha ona akordu bilateral ida ho governu Brunei Darussalam hodi haruka traballador Timoroan sira ba serbisu iha ne’eba,  iha tempu badak”, dehan, Vise PM ba Asuntu Ekonómika, Francisco Kalbuadi Lay, iha Díli foin lalais ne’e.

Vizita PR Ramos Horta ho ekipa ba Brunei Darussalam ne’e bazeia ba relasaun bilateral entre rai rua ne’ebé establese ona iha tinan 2002 hafoin Timor-Leste hetan ninia independensia totál.

Antes asina akordu bilateral refere, komitiva Timor-Leste ne’ebé lidera hosi Prezidente Repúblika, Jose Ramos Horta hala’o uluk enkontru ho Liurai Brunei Darussalam, Sua Majestade, Hassanal Bolkiah Ibni Omar Ali Saifuddien III, iha istana Nurul Imam, Brunei Darussalam.

“Vizita ne’e hodi hatan ba konvite husi Liu-rai Brunei Darussalam, Sua Majestade Hassanal Bolkiah ibni Omar Ali Saifuddien III ne’ebé hanesan belun diak ba Timor – Leste hafoin nasaun rua hahu estabelese relasaun diplomatika iha timor leste hahu independensia 20 de Maiu 2002”, dehan, Ministru Turizmu, Kalbuadi Lay.

Vizita ofisiál Xefe Estadu, Jose Ramos Horta no asina akordu bilateral hosi Ministru Turizmu hetan akompañamentu hosi Ministru Negosiu Estranjeiru no Kooperasaun (MNEK), Bendito dos Santos Freitas inklui Vise Xefe Estadu Maior Jeneral Forsas Armadas Major Jeneral Calisto dos Santos “Coli-Coliati”.

Tuir esperensia Governu anterior sira mós haruka ona traballador timoroan lubuk ida ona ba serbisu iha nasaun estranjeiru mak hanesan Koreia, Australia, Nova-Zelandia no seluk tan. (Editór, Guido Santos).

 

 

Pin It

Follow us on Twitter

Sign up via our free email subscription service to receive notifications when new information is available.