Díli-SMI: IX Governu ne’ebé lideradu hosi Primeiru Ministru – PM, Kay Rala Xanan Gusmão, entrega ona ofisiálmente proposta Orsamentu Jeral Estadu – OJE 2024 ho totál millaun rihun 1,95 Dollar Amerikanu ba Parlamentu Nasional – PN hodi bele halo ajendamentu atu diskute no aprovasaun.
Prezidente Parlamentu Nasional – PPN, Maria Fernanda Lay, esplika, sei konvonka reuniaun ho Komisaun Espesializada Permanente sira hodi halo ajendamentu para bele diskute iha plenaria PN nian.
“Iha tempu badak sei konvoka reuniaun ho Prezidente Komisaun Espesializada Permanente sira hodi diskute ajendamentu ba diskusaun OJE 2024 refere”, katak, Prezidente PN, Maria Fernanda Lay.
Proposta OJE ho valór totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, la-inklui ho fundu rezerva ba Seguransa Sosiál.
“Valór totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.
“Valór ida-ne'e inklui dotasaun millaun rihun US$ 1,83 ba Administrasaun Sentrál no millaun US$ 60 uza ba RAEOA”, dehan, Maria Lay
Hosi montante totál despeza ne’ebé prevee ba Administrasaun Sentrál no RAEOA, millaun 468,8 dollar amerikanu uza ba saláriu no vensimentu, millaun 386,3 US$ ba bens no servisu, millaun US$ 589,7.
Ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.
OJE 2024 ne’e Governu prevee ba área ekonómiku ho montante boot liu kompara ba asuntu saúde no edukasaun.
“Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9.
“Ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas’, tenik, Prezidente PN.
Proposta OJE 2024 nian entrega diretamente hosi Ministra Finansas, Santina José Rodrigues F. Viegas Cardoso, akompaña husi Vise-Ministra Finansas, Felicia Claudinanda da Cruz Carvalho no Vise-Ministru Asuntu Parlamentar, Aderito Hugo da Costa. (Editór, Rui Santos).
