Díli-SMI: IX Governu liu-hosi Ministériu Solidariedade Sosiál no Inkluzaun – MSSI, aprova ona Prosedementu Operativu Nornalizadu – PON kona-ba jestaun kazu no tekniku kordenasaun hodi apoia ba labarik sira ne’ebé sai vítima ba violensia sira.
PON ne’e nu’udar matadalan nasionál ne’ebé atu hala’o serbisu hodi fornese apoiu ruma ba labarik sira ne’ebé sai nu’udar vítima ba violénsia oi-oin nian.
“(PON) sai nu'udar padraun nasionál ba servisu fornese asisténsia ba feto no labarik ne'ebé sai vítima ba violénsia doméstika, violénsia seksuál no forma violensia sira seluk”, dehan, Ministra Verónica das Dores, foin lalais ne’e iha Díli.
Ministra ne’e konkorda katak PON ne’e importante tebes ba Governu atu bele proteze diretu labarik sira ne’ebé hetan violadu. Maibe antes Governu aprova sei halo leitura hosi parte legál sira.
“Ha’u aseita ho konteúdu SOP ida-ne’e, no agora faze tuir mai ita intrega ba jurídiku sira haree husi prespetiva legal ninian, antes ita halo lansamentu”, Minstra, tenik.
Pontu prinsipal hosi establesmentu PON ne’e katak atu atualiza informasaun sira iha PON bazeia ba dinámika servisu atuál.
Nune’e mós atu konsidera vítima nu’udar sentru iha ita-nia asisténsia hotu. Inklui atu haforsa organizasaun fornesedór servisu no mós Servisu Nain Sosiál sira-nia koñesementu hodi bele fornese servisu tuir padraun, no atu aumenta produsaun ba PON.
PON ba jestaun kazu ba protesaun ba labarik halo revizaun ba dala tolu ona, no iha ona dokumentu sira rua mak hanesan: dokumentu versaun komprehensivu no dokumentu versaun simples.
Konvensaun Internasionál kona-ba labarik, ratifika ona husi Estadu Timor-Leste dezde tinan 2003, no Lei Protesaun ba Labarik aprova ona husi Parlamentu Nasionál iha inisiu tinan 2023. (Editór, Caleri).
