Empreza Japaun Sei Harii Estaleiru Naval Iha Manatuto

Nune’e, liuhosi embaxadór Japaun iha Timor-Leste ho delegasaun empreza Tsuneishi Shipbuilding C. Ltd hala’o ona identifikasaun ba área Postu Administrativu Laleia no Postu Administrativu Manatuto Villa hodi harii industria roo refere.

“Empreza Tsuneishi Shipbuilding C. Ltd hala’o peskiza iha Timor-Leste no nota Timor-Leste sai nu’udar fatin potensial atu investe área estaleiru (shipbuilding) hodi harii indústria shipyard iha rai ho nia luan hamutuk 970 km2 iha Munisípiu Manatuto.

“Sira mai hala’o ona observasaun ba área Postu Administrativu Laleia no área Sau iha Postu Administrativu Manatutu vila”, dehan, Primeiru Ministru, Jose Alexandre Xanana Gusmão, Segunda, (20/11), iha Díli.

Tuir Xefe Governu katak kompania ne’ebé atu loke industria roo ne’e sei halo estudu komprensivu antes halo desizaun hodi implementa planu refere.

Dadaun ne’e hala’o ona estudu ba fatin identifikadu sira hodi haree kondisaun rai nomós tasi nian klean antes husu lisensa ba Governu hodi harii industria ne’e.

“Embaixadór mai ho kompañia hosi Japaun sira hakarak loke fatin ida atu halo roo ne’ebé boot no oi-oin. Sira buka hela fatin, sira haree ona fatin rua ka tolu maibe sira sei haree didiak rai ne’e sei tahan ka lae? Tasi klean oinsa?.

“Sira sei halo tan estudu no haree didiak, hodi ko’alia ho Governu hodi fó lisensa ba sira hodi halo fabrika ba halo roo iha Manatuto Villa no ida iha Laleira”, katak, PM Xanana Gusmão.

Xanana esplika, bazeia estimasaun bainhira investimentu ne’e harii sei oferese kampu traballu minimu 4.000 ba Timor-oan no sei prodús rò (vessel) hamutuk 10-12 kada tinan no sei harii eskola, ótel no ospitál.

Kompañia Tsuneishi Shipbuilding ne’e lokaliza iha área Hiroshima iha Japaun, iha fulan Agostu 2023 liubá hala’o ona vizita mai Timor-Leste hodi halo estudu no sira loke ona Japaun, Xina no Filipina no Timor-Leste. (Editór, Rui Santos).