Dili – SMI, Prezidente Conselho Imprensa Virgilio da Silva Guterres husu ba jornalista sira tenki independente iha profisionál hodi bele fo informasaun ne’ebé kualidade no kredibel.
Virgilio mós fo atensaun jornalista la’os deit independente maibe mós presiza iha kuiñesementu no kapasidade ne’ebé natón hodi nune’e bele halo notisia ba públiku ho imparsiál no balansu.
“Atu sai jornalista tenke independente katak nia iha kapasidade hodi hatene nia kuiñesimentu individual nian atu nune’e halo notisia ba públiku ho justo”, Dehan Virgilio ba jornalista sira Timor Plaza, Kinta, (18/01) hafoin lansamentu programa formasaun jornalizmu kompriensivu ne’ebé tuir planu sei realiza iha fulan Marsu tinan ida ne’e.
Eis Prezidenti Asosiasaun Jornalista Timor Lorosa’e – AJTL ne’e mós subliña katak lansamentu programa formasaun jornalizmu kompriensivu ne’e importante tebes ba jornalista sira atu bele haberan diak liu tan kapasidade iha area jornalizmu nian.
Nia esplika katak atu sai jornalista ne’ebé bele fó informasaun ba públiku ho kualidade no kredibel maka presiza tau atensaun ba pontu importante tolu maka hanesan kuiñesementu profisionál, hanoin kritíku no halo observasaun direta.
“Ida, Kuiñementu profisionál, jornalista tenki hatene area relevante sira atu bele halo nia notisia, Rua, hanoin kritiku, jornalista tenki iha kapasidade hodi halo kritika konstrutivu hodi aprofunda ba asuntu ruma, Tolu, vizita fatin, jornalista tenki identifika fatin atu bele observa hodi hetan informasaun los no realidade”, tenik eis Prezidente Konsellu RTTL ne’e.
Partisipa iha lansamentu programa formasaun jornalizmu kompriensivu ne’e maka membru Governu, United Nation Development Program (UNDP), Embaxada Japaun, mídia na’in no jornalista sira.
