Dili-SMI, Kompetisaun moris nu’udar dezafiu ida ne’ebé sadik feto balun deside an hodi hodi kompete ho mane sira halo serbisu hanesan badaen karpintaria no badaen ba konstrusaun nian.
Veronica da Costa nu’udar feto ho idade (22), husi munisipiu Aileu deside hodi tuir formasaun pedreiru nivél 3 iha Dom Bosco dadaun ne’e hala’o pratika iha terenu ba durasaun fulan rua hamutuk ho kompaña Bosconia Buillder ne’ebé halo hela konstrusaun edifísiu Centru Quesadhip Ruak, Taibessi.
“Ami estájiu tamba ami kompleta ona formasaun nivél 3 katak tinan ida (1) fulan neen (6), depois de estájiu ne’e hotu ami akaba formasaun nivél 3 nian”, dehan Veronica ba SMI iha nia estájiu fatin, Taibesi, Suku Kuluhun, (31/01).
Tuir Veronica katak ho vontade serbisu nu’udar vokasaun ida hili area karpintaria ne’ebé todan maibe nia brani deside atu sai pedreiru hodi hatudu ba públiku katak feto mós bele halo serbisu ne’ebé mane sira halo.
“Hau sente kontente hili area karpintaria tanba ita bele halo uma no halo serbisu ba konstrusaun edifisiu nian hanesan agora dadauk ami estajiu ba husu ba kolega feto katak ita mos bele ho ita nia vontade serbisu hatudu ba mane sira katak ita henesan” katak Costa
Nune’e mós Eugenia ho tinan (19) husi munisipiu Baucau ne’ebé hili formasaun kona-ba karpintária tanba bele halo produsaun ekipamentu sira hanesan meja, armariu, kama toba no seluk-seluk tan. mós sente kontenti hili area karpintaria atu sai karpintaria ne’ebé bele halo meza, kama, armariu no ba konstrusaun sira seluk ho esperensia ne’ebé sira iha bele kontribui ona ba dezenvolvimentu rai laran.
“Ha’u senti kontenti los hili area pedreiru tamba gosta atu halo uma no konstrusaun sira seluk konaba pedreiru ne’e ha’u senti ladun todan tamba ita uza makina hotu la’os uza manual” dehan Eugenia.
Nia informa tan katak tipu formasaun ne’ebé iha fatin formasaun Dom Bosco maka hanesan pedreiru, kanalizasaun, soldadura, karpinteiru, eletrisidade no AC. (Editor, Mateus Barros).
