Dili – SMI, Sorumutu entre Ministru Turizmu Manuel Vong ho Embasador Portugal ihaTimor-Leste, Jose Pedro Machado Vieira iha Ministeriu Turismu Farol - Dili foin lalais ne'e hatudu sinál pozitivu tanba Portugal iha vontade atu ajuda Timor-Leste hodi hadi’a turizmu sai diak liu tan iha futuru.
Pontu importante sira ne’ebé maka sai asuntu diskusaun durante sorumutu entre Ministru Turizmu ho Embasador Portugal maka Portugal hakarak hatama turizmu nu’udar programa foun iha kooperasaun entre Timor-Leste ho Portugal, apoiu tekniku espesialusta atu dezenvolve Sistema mapamentu no ordenamentu espasu turistiku, Sistema konta satellite turizmu, Sistema informasaun integradu turizmu, fo formasaun lingua portuguesa funsionariu turizmu no asesoria juridiku ba turizmu nian.
“Portugal prontu fo apoiu tekniku especialista atu dezenvolve sistema Mapeamento no Ordenamentu espasu Turistiku; Sistema Conta Satelite Turismu; Sistema informasaun integradu Turismu; Professores no Formadores Lingua Portuguesa ba Turismu; Assesoria Juridika ba Turismu nian”, Hakerek Ministru Manuel Vong iha ninia pajina FB, Tersa, (30/01)
Iha okaziaun ne’e Manuel husu Portugal atu fo apoiu ordena Tasi ibun Avenida Portugal - Praia dos Coqueiros iha Dili sai hanesan ho modelu calssadas tipu Portuguesa nian.
Eis Reitor DIT ne’e dehan Portugal prontu atu simu no halo formasaun ba funsionariu públiku ministeriu turizmu nian iha portugal, apoiu atu halo levantamentu no identifikasaun ba obra fizika no eskrita sira ne’ebé Portugal rasik halo ona durante tinan 500 hodi sai nu’udar patrimoniu kultural turizmu ba Timor-Leste.
“Portugal prontu atu simu no halo formasaun ba funsionariu públiku MT nian iha Escola Superior Turismu Estoril no Algarve Portugal, apoiu Portugal halo levantamentu no identifikasaun ba obras fizikas no eskritas hirak ne’ebé Portugueses sira halo ona durante tinan 500 nia laran nu’udar Patrimoniu Cultural no Historico Timor-Leste nian ba Turismu”, dehan nia iha nia pajina FB. (Editor, Mateus Barros).
