Dili - SMI, Hodi komemora loron domin (Valentine Day) ne’ebé sei monu iha loron 14 Marsu tinan ida ne’e, komunidade Suku Motael, Sub Administrativu Vera \-Cruz, Munisipiu Dili realiza feira hodi anima joven hodi minimiza violensia relasiona ho situasaun polítika iha rai-laran.
“Objetivu loke feira ida ne’e ba loron valentine nian hodi bele anima joven no dada joven sira iha situasaun ne’ebé maka sei falha hela, tamba agora dadaun ita iha situasaun ne’ebé maka ladun diak, atu halo fali Eleisaun Antisipada diak liu loke feira ne’e atu bele dada fali joven sira mai anima iha fatin ne’e, hodi halakon violensia entre joven ho joven’’, dehan Prezidente Komisaun Organizadora Feira, Lucia de Carvalho ba SMI iha Faról, Kinta, 01/02).
Espanduk MTCI iha fatin feira. Foto, SMI
Nia esplika katak feira ne’e faan produtu prodútu lokal, mini market, prodútu tais inklui mós jogu Kasinu, iha ne’ebé hahu husi tuku hat lorokraik to’o tuku sanolu resin rua ho balun. Maske kalan maibe feira ne’e hetan siguransa husi Ofisiál Polisia Suku Motael nian.
Agostinho Ximenes nu’udar na’in ba jogu kasinu apresia ba inisiativa suku Motael ne’ebé halo kordenasaun ho Ministériu Turizmu Komersiu no Industria – MTKI hodi anima joven sira para bele evita konfilitu entre joven sira.
“Hau senti kontenti ho feira ida ne’e tamba feira ida ne’e loke husi entre suku no suporta husi MTCI hodi bele anima joven sira”, dehan Augostinho.
Feira ne’e apoiu husi MTCI, Xefi Suku Motael, Telkomcel, iha mos karta lisensa husi jogu nian, nomos juventude husi parte Igreja Motael rasik. Parte MTKI fasilita lona no besi riin hodi harii tenda no parte jogu nian fasilita ekipamentu jogu nian. Tuir planu feira ne’e sei taka iha loron 16 Fevereiru tinan ida ne’e. (Editor, Mateus Barros).
