Dili-SMI, Komandante Jerál Polisia Nasional Timor Leste – PNTL, Komisariu Julio Hornay esplika katak ninia parte kordena ho Komandante Jerál Falintil – Forsa Defeza Timor Leste – F-FDTL hodi asegura estabilidade durante periodu kampaña no loron eleisaun antisipada nian.
“Hau ho maijor General prepara ona planu sira ne’e ho nesesidade orsamentu atu apoiu, para atu nune’e bele estabelese siguransa ne’ebé diak ba eleisaun antisipada ne’ebé sei mai”, esplika Julio Hornay ba jornalista sira hafoin sorumutu ho Prezidente Repúblika iha Palasiu Prezidente Nicolau Lobato, Kinta, (01/02).
Julio reforsa katak simu ona despasu husi Ministériu Defeza no Siguransa hodi hola parte ho militar atu asegura prosesu tomak ne’ebé iha relasaun eleisaun antisiapda ne’ebé sei akontese iha tempu badak.
“Preparasaun ho forsa defeza timor leste atu asegura lala’ok eleisaun antisipada ne’ebé ita nia PR desidi hodi asegura eleisaun antisipada ida ne’e hahu husi kampaña politika, to’o eleisaun, kontagen de votu to’o formasaun governu. Ministru Defeza no Siguransa mós hasai ona despaisu ba ami”, dehan Hornay.
Komandante polisia ne’e husu ba povu tomak atu kontinua hatudu maturidade politika hanesan timor oan hodi nune’e bele hametin paz no estabilidade durante periodu eleisaun antisiapda ne’ebé akontese iha Timor-Leste.
Espesifikamente, Eis Komadante Formasaun Akademia Polísia ne’e husu ba juventude atu hatudu hahalok ne’ebé diak no hakmatek hodi kontribui ba prosesu demokratizasaun iha Timor-Leste. (Editor, Mateus Barros).
