Dili-SMI, Komisaun Permanente Parlamentu Nasional – KPPN ne’ebé establese ona durante fulan ida depois Prezidente Repúblika dezolve Parlamentu maibe to’o ohin loron seidauk iha ajenda plenaria tanba sei hein paraser juridiku.
Prezidente PN Aniceto Guterres esplika katak wainhira deside hodi halo plenaria ka konvoka konfrensia ho lider bankada sira enkuantu iha ona paraser juridiku.
“Sei hein Pareser husi juridiku ne’e mai depois de semana oin PPN sei konvoka konferensia ho lideres bankadas para atu halo ajenda. Komisaun Permanente mós hanesan plenaria parlamentu nasional bain-bain, kuando konvoka ne’e tenki iha ajenda, tenki iha ordem do dia“, dehan Aniceto iha uma fukun PN, Kinta, (22/02).
Eis Prezidenti Bankada Fretilin ne’e klarifika katak durante ne’e komisaun permanente semana-semana iha reuniaun maibe seidauk tuir konfrensia bankada sira tanba presiza iha paraser juridiku kona-ba intrepretasaun funsionamentu parlamentu depois hetan dezolve.
Iha parte seluk, Deputadu KHUNTO Luis Roberto da Silva kestiona kona-ba vontade prezidente PN ne’ebé durante ne’e abandona plenaria hodi lakohi konvonka reuniaun komisaun permanente nian liu plenaria.\
“Prezidenti parlamentu tamba saida mak labele kria konvokatoriu iha plenaria, komisaun permanente funsiona maibé nusa mak labele halo nia knar ida ne’e, tamba saida mak bele akontese, tamba saida mak abandona nafatin“, dehan Luis
Nia esplika katak membru komisaun permanente ne’ebé hili husi partidu 5 sempre marka prezensa iha plenaria maibe prezidente PN maka la realiza plenaria. (Editor, Mateus Barros).