Dili-SMI, VII Governu Konstitusional liu Primeiru-Ministru - PM Mari Bin Amude Alkatiri aprezenta Dekretu Lei Konsellu Nasionál Veteranu ba Prezidente Repúblika Francisco Guterres Lú Olo.
Primeiru Ministru Mari Alkatiri esplika katak ninia parte halo aprezentasaun dekretu lei veteranu ba Prezidente Lú Olo para bele haree no fó kompetensia ba veteranu hodi organiza an diak liu tan iha futuru.
“Ohin hau lori asuntu rua, ida maka Dekretu Lei Konsellu Nasionál veteranus tenki aselera entaun tamba ita hotu hatene katak loron, 3 Marsu ne’e loron veteranus, ita tenki organiza diak liu veteranus sira, ita tenki fó ba sira kompetensia para sira rasik mak identifika se mak veteranus se mak la veteranus tamba ne’e mak hau intrega hela iha ne’e para prezidente hare’e”, dehan PM hafoin hasoru malu ho PR iha Palasiu Prezidensial Aitarak Laran ,Kinta (22/02).
Xefe Governu ne’e mós esplika katak hasoru malu Prezidente Repúblika ne’e koalia mós kona-ba asuntu fronteira maritima ne’ebé dadaun iha hela prosesu negosiasaun.
“Enkotru ne’e koalia mós kona-ba politika nasionál liga ho asuntu fronteira maritima ne’ebé mak oras ne’e diskute hela iha Malayzia”, dehan Mari.
Maske nune’e, Sekretariu Partidu Fretilin ne’e klarifik katak nia rasik seidauk hatene lolos informasaun kona-ba diskusaun kona-ba asuntu fronteira maritima ne’ebé xefi negosiador Kay Rala Xanana Gusmão halo iha Malaysia. (Editor, Mateus Barros).
