Dili-SMI, Atu fasilita estudante Colegio São Miguel Arcanjo hodi estudan istoria funu Timor-Leste nian nomós nu’udar parte ida husi prezervasaun istoria funu ba jerasaun foun, Centru Nacional Chega – CNC loke sentru biblioteka iha area refere.
Diretúr Ezekutivu CNC Hugo Maria Fernandes haktuir katak establesementu sentru biblioteka iha Colegio São Miguel Arcanjo ba datoluk ne’ebé antes ne’e CNC establese ona sentru biblioteka iha eskola rua hanesan Eskola 04 Setembru no Eskola Sekundaria Canossa Has-Laran.
“Lansamentu biblioteka ba kada eskola ida ne’e ba dala tolu ona komesa hahu husi eskola sekundaria geral Nú 04 de Setembru, sekola sekundaria Canossa Has Laran Komoro no ba datoluk iha eskola Colegio são Miguel Arcanjo”, dehan Hugo Fernandes iha Eskola Colegio São Miguel, Sexta, (23/02), semana kotuk.
Diretúr CNC haktuir katak planu prezervasaun istoria liu husi establesementu sentru biblioteka “chega” ne’e la’os deit iha kapital Dili maibe mós sei akontese ba iha eskola sira iha munisipiu, liu-liu eskola sira ne’ebé iha ona biblioteka rasik.
Membru Conselho Imprensa – CI ne’e husu ba estudante Colegio São Miguel atu aprende nafatin memoria ne’ebé akontese iha tempu pasadu to’o ohin loron. Tanba, nia kontinua katak nasaun ida atu hamrik mesak sempre ho ninia istoria rasik.
Iha parte seluk, Diretú Colegio São Miguel Matias Borromeu apresia ba inisiativa CNC nian ne’ebé hakarak prezerva istoria timor ne’ebé akontese iha pasadu ba jerasaun foun liu-liu estudante sira ne’ebé eskola iha nivel sekundaria.
Nia aumenta katak lansamentu ne’e mós ajuda tebes ba mestre no mestra sira hodi kompriende diak liu tan istoria pasadu nia iha timor-Leste.
Tur planu CNC sei establese sentru biblioteka iha eskola sekundariu sira teritoriu laran inklui mós Universidade sira. (Editor, Mateus Barros).
