Dili–SMI, Governu Australia liu ninia Embasador iha Timor-Leste deklara katak iha komitementu maka’as atu resolve problema fonteira martima entre Timor-Leste ho Australia ne’ebé dadaun ne’e iha prosesu negosiasaun.
“Ita nia servisu hodi konkorda fronteira maritima entre Timor-Leste no Austrália hatudu kona-ba saidá mak ita bele atinji nu’udar país viziñu, parseiru no belun. Agora ita iha biban ida ne’ebé furak liu atu harii kapitulu tuir mai sobre ita nia parseria”, dehan Embasador Australia ba Timor-Leste, Peter Roberts OAM, hafoin entrega karta kredensiál ba Prezidente Repúblika, Kinta, (22/02) iha Palasiu Prezidensiál Aitarak-Laran.
Embasador Roberts reafirma katak koperasun bilateral entre Australia no Timor-Leste importante tebes ba futuru nu’udar nasaun viziñu ne’ebé ninia parseira metin ona durante ne’e. Nune’e, nia hatutan katak Australia iha komitementu hodi konsidera Timor-Leste nu’udar parseiru prinsipál ba dezenvolvimentu iha aspetu oioin.
“Austrália mak Timor-Leste nia parseiru prinsipál ba dezenvolvimentu no seguransa, no suporta Timor-Leste nia objetivu sira atu diversifika ninia ekonómia no suporta kresimentu setór privadu”, dehan Peter.
Tuir Ebasador ne’e katak liu husi koperasaun bilateral ne’ebé durante ne’e la’o iha area edukasaun nian, Governu Australia fó ona bolsu estudu ba timoroan hamutuk ema na’in atus lima lima nolu (550) hodi akaba ninia kursu iha Universidade sira iha Australia.
“Timoroan liu 550 mak akaba tiha ona sira nia estudu iha Austrália liu-husi programa bolsa-estudu Austrália nian, no mos ema Austrália nain 440 resin mak mai tiha ona estuda iha Timor-Leste liu-husi New Colombo Plan. Timor-Leste sai hanesan parseiru favóritu iha Australia nia Seasonal Worker Program; oportunidade furak ida ba trabaladores Timoroan no kompañia na’in sira iha Austrália”, tenik nia.
Embaixadór Roberts ba dahuluk servisu hanesan negosiadór prinsipál ba Parseria Ekonomiku Japãun no Austrália, Akordu Komérsiu Livre Xína no Austrália, no apoiu internasionál ba mudansa klimatíka.
Nia mos asumi tiha ona kargu iha tasi-balu hanesan Konsileiru Polítiku iha Embaixada Austrália, Japãun; Segundu Sekretáriu, Altu Komisáriu Australianu iha Samoa; no nu’udar Sénior Monitór Sivíl, Grupu de Monitoramentu da Paz iha Papua Nova Guiné. Nia mos simu tiha ona Medala Orden da Austrália ba ninia servisu ne’ebé buka no rekua vitima sira husi dezastre rai-nakdoko no tsunami iha Japaun, iha tinan 2011. (Editor, Lariwa).
