Dili-SMI, Membru Deputadu Bankada Kongresu Nasionál Rekonstrusaun Timor (CNRT sigla Protugues) Deonisio da Costa Babo Soares hateten katak iha tempu badak nia laran sei dada kadora greater sunrise mai iha Timor-Leste.
Deputadu afirma dadaun ne’e ekipa Negosiador Delimitasaun Fronteira Martima ne’ebé lidera husi Kay Rala Xanana Gusmão ne’e halo hela esforsu hodi lori kadoras mai Timor-Leste iha tempu badak nia laran.
“Hau fiar katak ita konsege duni porque se ita koalia lolos ne’e tama iha kuandu ita asina ona ita nia fronteira maritima iha dia 06 hanesan planu anual husi Sekretáriu Jerál nasoens unidus, klaru ke rekursus sira ne’ebé gretear sunrise ne’ee sei tama mai iha area juristasaun Timor- Leste”, dehan Babo iha uma fukun PN, Kuarta, (22/02).
Mapa Greaters Sunrise iha area tasi-timor. Foto, internet.
Tanba, Babo hatutan katak negosiasaun dadaun ne’e hela deit ajustamentu hodi diskute kona-ba oinsa mekanizmu atu dada kadoras greater sunrise mai rai-laran. Ho nune’e, eis Ministru Justisa ne’e fiar katak vantejen boot kadoras greater sunrise sei mai Timor-Leste.
Nia esplika tan, enkontru ekipa negosiasaun durante loron 19 to’o 22 Fevereiru foin lalais ne’e hahu debate ona substansia hodi define lolos kona-ba distinu kadoras greater sunrise mai Timor-Leste.
Antes ne’e Governu Timor-Leste liu husi Primeiru Ministru Mari Alkatiri deklara ona katak seidauk iha serteza hodi dada kadoras greater sunrise mai Timor-Leste ka ba Australia.
“Seidauk deside atu mai timor ka ba Australia. Iha 20 Marsu maka hasoru Malu fali iha Malaysia antes ba Nova Yorke”, Dehan Mari wainhira hasoru malu ho Prezidente Repúblika, Kinta, (15/02) iha Palasiu Prezidensiál Aitarak-Laran.
Iha parte seluk, relasiona ho asuntu dada kadoras mai Timor-Leste, sosiadade sivil hanesan La’o Hamutuk bolu atensaun ba Governu atu halo estudu didiak antes halo desizaun, liu-liu kona-ba gastus no benefisiu husi dada kadoras mai rai-laran. (Editor, Lariwa).
