Dili-SMI, Parlamentu Nasionál Timor-Leste – PN-TL iha tempu badak sei iha meius komunikasaun rasik hanesan Televizaun no Rádiu ne’ebé atu uza hodi fasilita públikasaun atividade plenária PN nian ba públiku.
Atual Prezidente PN-TL, Aniceto Longuinhos Guterres konfirma ba jornalista SMI katak liu husi koperasaun bilateral entre Brazil no Timor-Leste atu fó kapasitasaun funsionariu PN iha area rádiu no televizaun parlamentar hodi nune’e fasilita emisaun atividade parlamentar ba públiku.
Aniceto haktuir katak koperasaun ne’e hahu kedan iha tinan 2010 maibe foin maka bele asina akordu hodi nune’e bele implementa ona projetu formasaun ne’e. Tuir akordu katak implementasaun akordu koperasaun durante tinan rua nia laran.
“Koperasaun entre nasaun rua ne’e halo negosiasaun kleur ona dezde iha tinan 2010 sei altura Prezidente Parlamentu saudozu Fernando Lasama nia tempu. Negosiasaun no kontinuasaun mai eis Prezidente Parlamentu Vicente Guterres mai to’o iha Aderito Hugo, ohin asina akordu hodi fo kontinua nafatin ba akordu koperasaun ne’ebe iha”, dehan Aniceto hafoin asina akordu iha uma fukun PN, Kinta, 22/02).
Iha fatin hanesan Sekretáriu Jerál PN haktuir katak PN ninia ekipamentu rádiu nia instala ona no hein deit atu halo emisaun. Maibe, iha area televizaun nian maka sei iha prosesu planeamentu hodi harii hodi nune’e rádiu no televizaun bele funsiona ho diak.
“Kapasitasaun ba area rádiu no televizaun parlamentar, audiu visual ida ne’e mak importante tamba tuir lolos rádiu funsiona maibé agora televisaun mak seidauk maibe iha ona planu atu hari’I”, dehan Mateus Belo.
Tuir Belo katak apoiu asistensia tekniku ba rádiu no televizaun parlamentar ne’e mai husi Brazil ne’ebé fó kapasitasaun tuir akordu entre nasaun rua ne’e nian.
Asina akordu koperasaun bilateral ne’e entre Embasador Brazil iha Timor-Leste Aldemo Garcia no Prezidente PN, Aniceto Guterres. (Editor, Mateus Barros).
