Dili – SMI, Eis Komandante Falintil Lere Anan Timur husu ba joven sira labele hatudu mentalidade at hodi buka fahe lider istóriku sira ne’ebé uluk hamutuk ho prinsipiu ida metin ba ukun rasik-an.
Tuir Komandante Jerál F-FDTL ne’e katak jerasaun foun ne’ebé diak no hadomi nasaun ida ne’e tenki hatudu maturidade diak hodi labele halo separasaun luta lider ida ho lider seluk. Tanba independensia ne’e lider istoriku hothotu halo kontribuisaun ba ukun rasik-an.
“Ita hotu-hotu hatene katak, ohin loron ita nia lider istoriku sira ne’ebe uluk serbisu hamutuk tantu frente externa, tantu frente interna sira tau sira nia esforsu hamutuk, tau sira nia matenek hamutuk mak ohin loron ita sai nasaun ida soberanu iha mundu rai klaran”, dehan Lere Anan Timor iha Palasiu Prezidensiál Aitarak-Laran hafoin remata enkontru ho PR, Kuarta, (21/02).
Jenerál fitun rua ne’e lamenta ho atetude jerasaun foun oin loron ne’ebé iha intensaun at hodi defende lider ida no koalia at lider seluk. Tuir nia katak wainhira hahu prosesu luta ba libertasaun nasionál ne’ebé lider istoriku sira tuur hamutuk hodi halo funu, dalaruma jerasaun foun sira ne’e seidauk moris.
“Ohin loron ita hare’e ba kuaze jerasaun foun hakarak fahe ita nia lider istoriku sira ne’e balu dehan ida ne’e diak liu. Sira la hatene istoria, sira la moris iha prosesu libertasaun nasional ninian, ami ne’ebé sente ami nia isin lolon problema hirak ne’ebé tula iha ami nia kabaas leten ne’e hakarak atu hetan ukun án”, Lere koalia ho oin seriu.
Atual lider militar ne’e kontinua husu ba lider istoriku sira hanesan Kay Rala Xanana Gusmão, Mari Alkatiri, José Ramos Horta, Taur Matan Ruak hodi koalia balu atu hadi’a povu nia moris iha futuru.
Iha parte seluk, Abilio de Araujo nu’udar lider istóriku mós lamenta ho atetude jerasaun foun ne’ebé gosta fahe lider sira hodi kria polimika iha sosiadade nia leet.
Tuir Abilio katak komitmentu lider sira iha tempu 1975 hodi luta ba libertasaun nasionál liu husi frente interna no frente esterna ne’e tanba desizaun mai husi Prezidente Nicolau Lobato. Tanba ne’e laiha razaun jerasaun foun sira atu hafahe lider istoriku sira. (Editor, Lariwa).
